ՀՀ նախագահը մասնակցել է «Այբ» դպրոցում տեխնոլոգիական արհեստանոցի բացմանը
ԵՐԵՎԱՆ, 11 հոկտեմբերի. /ԱՌԿԱ/. ՀՀ նախագահ Սերժ Սարգսյանը շաբաթ օրը մասնակցել է «Այբ» կրթական ավանում գտնվող արհեստանոց-լաբորատորիաների՝ ֆաբլաբերի բացմանը։
Նախագահը ծանոթացել է արհեստանոց–լաբորատորիաների ներդրման հայկական ծրագրին, որի նպատակն է կրթական ոլորտը տեղափոխել կիրառական դաշտ։ Ծրագիրը ստեղծվել է 2013 թ.–ին «Այբ» հիմնադրամի և Մասաչուսեթսի տեխնոլոգիական ինստիտուտի համագործակցության շնորհիվ`ՀՀ ԿԲ–ի և VivaCell-MTS ընկերության աջակցությամբ։
«Այբ» հիմնադրամի գործադիր տնօրեն Դավիթ Սահակյանի խոսքով` ֆաբլաբը լաբորատորիա է, որը թույլ է տալիս արտադրել նախատիպեր։ «Ինժեներները, ռոբոտաշինության մասնագետները, աշակերտները հնարավորություն կունենան ստեղծել առաջին կոնցպետները, որոնք հետագայում կկատարելագործվեն։ Ֆաբլաբը կծառայի ոչ միայն «Այբ» դպրոցի աշակերտներին, այլ նաև բաց կլինի ինժեներների, ճարտարապետների և ուսանողների համար», – ասաց Սահակյանը։
«Այբ» հոգաբարձուների հիմնադրամի խորհրդի նախագահ, Մեսրոպ քահանա Արամյանի խոսքով` տեխնոլոգիաներին տիրապետելը կրթության անբաժանելի մասն է։
«Կարևոր է, որ տարածաշրջանի առաջին ֆաբլաբերը հայտնվել են այստեղ և Դիլիջանում։ Երեխաները հնարավորություն կունենան կյանքի կոչել իրենց գաղափարները մասնագիտական միջավայրում։ Նախագիծը կարևոր է նաև այն պատճառով, որ դրանք (ֆաբլաբերը) ստեղծվել են Մասաչուսեթսի տեխնոլոգիական ինստիտուտի կողմից, որը տեխնոլոգիական կրթության ոլորտում գործող առաջատար ինստիտուտներից է», – ասաց Արամյանը։
VivaCell-MTS–ի գլխավոր տնօրեն Ռալֆ Յիրիկյանն իր հերթին նշեց, որ բավարար չէ միայն խոսել նոր տեխնոլոգիաների մասին, դրանք հարկավոր է նաև կյանքի կոչել։ «Այն, ինչ այսօր մենք տեսնում ենք արհեստանոց–լաբորատորիա է, որը նոր գաղափար է տարածաշրջանում։ Համագործակցելով համաշխարհային հսկաների հետ` մենք ցանկանում ենք մեր ներդրումը կատարել աշխարհում։ Հավատում եմ, որ նման հնարավորությունը թույլ կտա մեր երիտասարդներին զարգանալ, ինչը կհանգեցնի նաև երկրի տնտեսական զարգացմանը», – ասաց Յիրիկյանը։
Միջոցառման շրջանակում տեղի է ունեցել նաև «Այբ» միջին դպրոցի նոր մասնաշենքի հիմնարկեքի արարողությունը, որը ներառվում է համանուն կրթական համալիրի կազմում։ Շենքի բացումը նախատեսվում է 2016 թ.–ին։ Նախատեսվում է, որ շենքը կբավարարի 5-9-րդ դասարանցի 180 աշակերտների ուսումնառության պահանջները: Այն քառահարկ է՝ 4200 քմ ընդհանուր մակերեսով, ունի բազմաթիվ լաբորատորիաներ ու արհեստանոցներ, արվեստի ու արհեստի ստուդիաներ, մարզասրահ, դահլիճ-ամֆիթատրոն, հանգստի և խաղի գոտիներ:–0–