Հայաստանը պետք է ներկայացնի իր տեխնոլոգիական ներուժն` առաջարկելով ստեղծարար մոտեցում, ճկունություն և որակ. փորձագետ
ԵՐԵՎԱՆ, 15 մայիսի. /ԱՌԿԱ/. Հայաստանը պետք է ցույց տա, որ լուրջ տեխնոլոգիական ներուժ ունի` առաջարկելով ստեղծարար մոտեցում, ճկունություն և որակ, հայտարարեց Ինֆորմացիոն տեխնոլոգիաների ձեռնարկությունների միության (UITE) գործադիր տնօրեն Կարեն Վարդանյանը։
«Հայաստանում տեղեկատվական տեխնոլոգիաների ոլորտը տարեկան աճում է 20–25 տոկոսով, ուրիշ ոլորտների համար սա կլիներ հիանալի արդյունք, սակայն այս ոլորտի համար նման աճը բավարար չէ», – նշեց Վարդանյանը։
Նրա խոսքերով` Հայաստանում ՏՏ ոլորտում աշխատում է 10 հազար մասնագետ, և հարկավոր է լուծել մի շարք խնդիրներ, որպեսզի պետությունը պահպանի մրցունակությունն այդ ոլորտում։
«Առաջին խնդիրը մասնագետների թվի ավելացումն է։ Մենք խնդիր ունեք, հարկավոր է առնվազն 4–5 անգամ ավելացնել մասնագետների թիվը։ Մենք տեսնում ենք, որ չենք կարողանում լրացնել այդ բացը բուհերի միջոցով, այդ պատճառով հարկավոր է ուշադրություն դարձնել դպրոցներին», – հայտարարեց նա։
Վարդանյանի խոսքերով` համաշխարհային միտումները վկայում են, որ բազային ինժեներական հմտություններն ու ծրագրավորման հմտությունները բացահայտվում են դպրոցական տարիներից։ Այս պահին Հայաստանի մարզերի 54 դպրոցներում գործում են ռոբոտոտեխնիկայի խմբակներ, 10 խմբակ գործում է Երևանի նույնքան դպրոցներում և 20 ինժեներական լաբորատորիաներ` երկրի դպրոցներում։
«Բանն այն է, որ 2020 թ.–ին միայն ԱՄՆ–ի ՏՏ ոլորտում կլինի 2,5 մլն թափուր աշխատատեղ, իսկ որքա՞ն մարդ մենք կպատրաստենք», – նշեց Վարդանյանը։
Նրա խոսքերով` ՏՏ խմբակները հնարավորություն են տալիս երեխաներին վաստակել լուրջ գումարներ։
UITE– ի նախաձեռնած Լաբորատորիաների ներդրման ծրագրի նպատակն է զարգացնել տեխնոլոգիական մտածելակերպը դպրոցականների շրջանում, փոխանցել տարրական ինժեներական գիտելիքներ և հետագա մասնագիտական կողմնորոշում։
Հայաստանի ինֆորմացիան տեխնոլոգիաների միությունը (UITE) հիմնադրվել է 2000 թ.–ին` ոլորտում գործող ընկերությունների տնտեսական շահերը պաշտպանելու, բիզնեսի զարգացումը խթանելու, ՏՏ ոլորտի հետազոտությունները խրախուսելու նպատակով։ Հիմա Միության կազմում ներառված է մոտ 60 ընկերություն, որոնք ներկայացնում են Հայաստանի բարձր և տեղեկատվական տեխնոլոգիաների ոլորտը։ –0–