Հայաստանում Facebook–ի օգտատերերի թիվն աճում է, հիմնական մասը ցանց է մտնում բջջայինների միջոցով. փորձագետ
ԵՐԵՎԱՆ, 9 նոյեմբերի. /ԱՌԿԱ/. Հայաստանում Facebook–ի օգտատերերի թիվն աճում է, հիմնական մասը ցանց է մտնում բջջայինների միջոցով, «ԱՌԿԱ» գործակալությանը տեղեկացրեց տեղեկատվական անվտանգության փորձագետ Սամվել Մարտիրոսյանը։
Նրա խոսքով` Հայաստանում սոցցանցի ակտիվ օգտատերերի թիվը, հոկտեմբերի տվյալներով, հասնում է արդեն 860 հազարի, որից 660 հազարն, այսպես թե այնպես, ցանց է մտնում բջջային սարքի միջոցով։
«Հայաստանում նկատվում է օգտատերերի թվի մշտական աճ, միաժամանակ աճի դինամիկան էականորեն դանդաղել է` նախորդ տարվա համեմատ», – ասաց Մարտիրոսյանը։
2015 թ.–ի հուլիսի տվյալներով` Facebook սոցցանցից օգտվող հայ ակտիվ օգտատերերի թիվը կազմել է 830 հազար։ Ամենաշատը Facebook–ից օգտվում են Երևանում, Գյումրիում և Վանաձորում, ընդ որում Հայաստանում տղամարդիկ և կանայք հավասարապես են օգտվում Facebook–ից։
Հայ օգտատերերը Facebook–ում անում են նույնը, ինչ բոլորը. շփվում են ընկերների հետ, խաղեր են խաղում, տարբեր թեստեր լրացնում։
Հայաստանում առավել տարածված են Одноклассники, Facebook և ВКонтакте սոցցանցերը։–0–