Beeline-ը զգալիորեն ավելացրել է 4G ռոումինգ-գործընկերների թիվը
ԵՐԵՎԱՆ, 13 դեկտեմբերի. /ԱՌԿԱ/. Beeline-ը հայտարարում է 4G ռոումինգ-գործընկերների թվի զգալի աճի մասին, հայտնում է ընկերության մամուլի ծառայությունը:
Beeline-ի բաժանորդների համար 4G ռոումինգն այսօր հասանելի է 52 երկրների 81 օպերատորների ցանցերում: 2018թ-ի ընթացքում այն երկրների ցուցակում, որտեղ հասանելի է 4G ռոումինգ, ավելացել են Ավստրիան, Մեծ Բրիտանիան, Գերմանիան, Իսրայելը, Կատարը, Մալայզիան, Մալթան, Մոլդովան, Մյանման, Սերբիան, Սլովենիան, Ուկրաինան, Խորվաթիան, Շվեդիան և Էստոնիան:
«Ռոումինգ-գործընկերների թվի աճի շնորհիվ կայուն ավելանում է այն երկրների թիվը, որտեղ Beeline-ի բաժանորդները կարող են օգտվել ոչ միայն ռոումինգի ձայնային ծառայություններից, այլև տվյալների փոխանցման ժամանակակից ցանցից: Մենք ձգտում ենք մշտապես ավելացնել գործընկերների թիվը, որպեսզի մեր հաճախորդները գործուղման մեկնելիս կամ արձակուրդում գտնվելիս կարողանան ստանալ կապի և ինտերնետի հնարավորինս բարձր որակ», - նշեց Հայաստանում Beeline-ի գլխավոր տնօրեն Անդրեյ Պյատախինը:
«Ընդհանուր առմամբ Beeline-ի բաժանորդները կարող են օգտվել ռոումինգի ծառայություններից աշխարհի 181 երկրների 441 օպերատորների ցանցերում: Նշենք, որ Beeline-ի բաժանորդները ցանկացած երկրում կարող են անվճար զանգահարել զանգերի սպասարկման կենտրոն +374 8000 0612 հեռախոսահամարով: Լրացուցիչ տեղեկատվություն կարող եք ստանալ www.beeline.am կայքում, հաղորդագրություն ուղարկելով Facebook սոցիալական ցանցում Beeline Armenia պաշտոնական էջին, զանգահարելով 0611 անվճար համարին կամ այցելելով մոտակա Beeline գրասենյակ», - նշվում է տարածած հաղորդագրությունում:
«ՎԵՈՆ Արմենիա» ՓԲԸ-ն (Beeline ապրանքանիշ) «ՎԵՈՆ» ընկերությունների խմբի մի մասն է, որն աշխարհի խոշորագույն ինտեգրված օպերատորներից մեկն է: Ընկերությունների խումբն ընդգրկում է մի շարք հեռահաղորդակցության ընկերություններ, որոնք մատուցում են ինչպես անլար և ամրակցված կապի տեխնոլոգիաների լայն շրջանակի վրա հիմնված ձայնային կապի ու տվյալների հաղորդման, այնպես էլ լայնաշերտ ինտերնետ հասանելիության ծառայություններ ավելի քան 240 մլն բաժանորդների Ռուսաստանում, Իտալիայում, Ուկրաինայում, Ղազախստանում, Ուզբեկստանում, Տաջիկստանում, Հայաստանում, Վրաստանում, Ղրղզստանում, Լաոսում, Ալժիրում, Բանգլադեշում և Պակիստանում: «ՎԵՈՆ» խմբի ընկերությունները ծառայություններ են մատուցում «Beeline», «Киевстар», «Wind», «Mobilink», «Banglalink» և «Djezzy» ապրանքանիշերի ներքո: Մանրամասներին կարելի է ծանոթանալ www.veon.com կայքում:–0–