Հայաստանի բանկային ոլորտի կայքերը բավարար չափով պաշտպանված չեն հակերական գրոհներից. փորձագետ
ԵՐԵՎԱՆ, 13 հունվարի./ԱՌԿԱ/. Հայաստանի բանկային ոլորտի կայքերը բավարար չափով պաշտպանված չեն հակերական գրոհներից, երեքշաբթի լրագրողներին հայտարարեց տեղեկատվական անվտանգության փորձագետ Սամվել Մարտիրոսյանը։
«Մտահոգություն է առաջացնում այն, որ ոլորտները, որոնք, ամենայն հավանականությամբ, պետք է ավելի պաշտպանված լինեն, այդ թվում նաև բանկային ոլորտը, բավարար չափով պաշտպանված չեն։ Ցավոք, 2014 թ.–ի ընթացքում բանկային կայքերի կոտրման դեպքեր են գրանցվել», – ասաց Մարտիրոսյանը։
Նրա խոսքերով` բանկային ոլորտը պետք է առավելագույն չափով պաշտպանված լինի, քանի որ բանկերի կայքերի վրա կազմակերպված գրոհները կարող են ազգային անվտանգության մակարդակի ռիսկեր ստեղծել։ Միաժամանակ նա պարզաբանեց, որ կայքերի պաշտպանվածության աստիճանի բարձրացման համար հարկավոր է լավացնել տեխնիկական աջակցության մակարդակը։
Փորձագետի խոսքերով` Հայաստանում ամենից շատ պաշտպանված են արտաքին քաղաքական գերատեսչության և նախագահի կայքերը։
«Մնացած բոլոր կայքերը բավականին հաճախ ենթարկվում են գրոհների։ Շատ դեպքերում տպավորություն է ստեղծվում, թե կայքի տերերն անգամ տեղյակ չեն, որ իրենց կայքը կոտրվել է», – ավելացրեց նա։–0–