ՀՀ նախագահը Նյու Յորքում կմասնակցի ArmTech բարձր տեխնոլոգիաների 7-րդ ամենամյա համաժողովի բացմանը
ԵՐԵՎԱՆ, 25 սեպտեմբերի. /ԱՌԿԱ/. ՀՀ նախագահ Սերժ Սարգսյանը կմասնակցի Նյու Յորքում կայանալիք ArmTech բարձր տեխնոլոգիաների 7-րդ ամենամյա համաժողովի բացմանը, հաղորդում է ՀՀ նախագահի մամուլի ծառայությունը:
Միջոցառումը տեղի կունենա 2014 թվականի սեպտեմբերի 26-ին ԱՄՆ Նյու Յորք քաղաքի «TKP» համաժողովների կենտրոնում:
Նախատեսվում է, որ համաժողովը կունենա ավելի քան 200 մասնակից Հայաստանից, ԱՄՆ-ից, Ռուսաստանից, Եվրոպայի, Միջին Արևելքի, Հյուսիսային Աֆրիկայի, ԱՊՀ երկրներից և այլ պետություններից:
Այս տարի համաժողովը կանցնի «Սովորել անցյալից, բացահայտել ապագան» նշանաբանի ներքո: Համաժողովի նպատակն է ներկայացնել բարձր տեխնոլոգիաների ոլորտի աճը, որը ռազմավարական նշանակություն ունի հայկական տնտեսության համար, ներգրավել օտարերկրյա ներդրումներ, աջակցել միջազգային համագործակցությանը, բարձրացնել բարձր տեխնոլոգիաների հայկական ոլորտի ճանաչելիությունը գլոբալ աշխարհում:
Ամեն տարի ArmTech համաժողովը համախմբում է ոլորտի տեղական և արտասահմանյան մասնագետներին, մասնավոր հատվածը ներկայացնող ղեկավարների և այլ շահագրգիռ կողմերի ողջ աշխարհից, ովքեր միասին քննարկում են միջազգային գործարար կապերի ամրապնդումը և ներդրումների հետագա աճը Հայաստանի բարձր տեխնոլոգիաների ոլորտում:
Համաժողովն անցկացվում է ՀՀ վարչապետի բարձր հովանու ներքո: Համաժողովի կազմակերպիչներն են ՀՀ կառավարությունը, ՀԲ-ն և «Ձեռնարկությունների ինկուբատոր» հիմնադրամը: Միջոցառման հովանավորներն են D-Link, Far և Cronimet ընկերությունները:
ArmTech-ը պարբերաբար անցկացվում է Կալիֆոռնիայի Սիլիկոնային հովտում և Հայաստանում: Առաջին համաժողովն անցկացվել է 2007 թ.-ի հուլիսի 4-7-ը Սան Ֆրանցիսկոյում: Վերջին համաժողովն անցկացվել է 2013 թ.-ի աշնանը Երևանում:-0-