«Զվարթնոց» օդանավակայանի ուղևորները կարող են օգտվել «Հայփոստի» պետական ծառայությունների մատուցման գրասենյակի ծառայություններից
ԵՐԵՎԱՆ, 14 փետրվարի. /ԱՌԿԱ/. ՀՀ արդարադատության նախարար Արփինե Հովհաննիսյանը երեքշաբթի «Զվարթնոց» օդանավակայանում մասնակցել է «Հայփոստ»-ի բաժանմունքում պետական ծառայությունների մատուցման միասնական գրասենյակի գործարկմանը, հաղորդում է ՀՀ արդարադատության նախարարության մամուլի ծառայությունը։
Նախարարի խոսքով՝ «Զվարթնոց» ժամանողներն ու մեկնողները պետական մարմնից համապատասխան տեղեկանքը ստանալու համար կարող են մտնել օդանավակայանում գործող «Հայփոստ»-ի գրասենյակ, դիմում ներկայացնել կամ ստանալ պատրաստված փաստաթուղթը՝ խնայելով և՛ ժամանակ, և՛ ճանապարհածախսի համար հատկացվող ֆինանսներ:
Արփինե Հովհաննիսյանի խոսքով՝ հնարավոր է այնպիսի իրավիճակ, երբ քաղաքացին կարող է օդանավակայանի «Հայփոստ»-ի գրասենյակում ներկայացնել դիմում, օրինակ՝ ընտանեկան կարգավիճակի կամ չդատվածության մասին տեղեկանք ստանալու վերաբերյալ, և փաստաթուղթը ստանալ քաղաքում գործող մեկ այլ միասնական գրասենյակից:
«Քաղաքացին կարող է նաև Երևանում կամ մարզերում գործարկված գրասենյակներից մեկում ներկայացնել դիմում՝ մատուցվող ծառայություններից որևէ մեկի վերաբերյալ, իսկ տեղեկանքը ստանալ հենց օդանավակայանում և մեկնել»,-ասել է նախարարը:–0–