ՀՀ կառավարությունը պատրաստ է ֆինանսավորել ՏՏ ոլորտում իրականացվող նոր ծրագրերը. վարչապետ

ԵՐԵՎԱՆ, 14 դեկտեմբերի. /ԱՌԿԱ/. ՀՀ կառավարությունը պատրաստ է ֆինանսավորել ՏՏ ոլորտում իրականացվող նոր ծրագրերը, հայտարարել է ՀՀ վարչապետ Հովիկ Աբրահամյանը դեկտեմբերի 12–13–ը Վանաձորում կազմակերպված «Hackathon [YAN] Մանկություն–2015» նորարարական գաղափարների մրցույթն այցելելուց հետո։

Մրցույթի շրջանակում մասնակից թիմերը, որոնք հիմնականում բաղկացած են ծրագրավորողներից, ընդամենը 24 ժամվա ընթացքում մշակում և ժյուրիին են ներկայացնում իրենց գաղափարներն ու առաջարկվող ծրագրի հավելվածի նախատիպը։

Միջոցառմանը մասնակցել են մոտ 250 երիտասարդներ` Երևանից, Գյումրիից, Վանաձորից և Հայաստանի այլ քաղաքներից։

ՀՀ վարչապետը շփվեց մրցույթի մասնակիցների հետ և ծանոթացավ նրանց ներկայացրած նորարարական գաղափարների և նախագծերի հետ։

Նա ողջունեց նման մրցույթների անցկացումն ու ընդգծեց, որ ՏՏ ոլորտը Հայաստանում զարգացման մեծ ներուժ ունի։

«Կառավարությունը հարկային արտոնություններ է տրամադրել ՏՏ ոլորտի սկսնակ ընկերություններին։ Արդեն ստեղծվել է մոտ 40 նոր ընկերություն։ ՏՏ ոլորտը մեզ համար առաջնահերթ ուղղվածություն է, մենք պատրաստ ենք ֆինանսավորել նոր ծրագրեր` այս ոլորտում մեծ առաջընթաց արձանագրելու համար։ ՏՏ ոլորտում մենք մեծ ներուժ ունենք, ամեն տարի գրանցվում է 25 տոկոսանոց աճ։ Պետք է մեր աճող սերնդին ուղղորդենք այդ ոլորտ, քանի որ այն մեծ ապագա ունի», – ասել է Աբրահամյանը։
Абрамян.

Hackathon [YAN] մրցույթը 2011 թ.–ից անցկացվում է Հայաստանում ամեն տարի, այն ՏՏ ոլորտում կազմակերպվող գլխավոր իրադարձություններից է։ Մրցույթի շրջանակում ծագած մի քանի գաղափարներ արդեն դարձել են start-up տեխնոլոգիաներ, որոնք հաջողությամբ կիրառվում են շուկայում։

Այս տարի Hackathon [YAN] մրցույթը կազմակերպվել էր Վանաձորում։ Մրցույթին մասնակցելու համար գրանցվել էին ավելի քան 70 թիմեր և startup-եր, իսկ մասնակիցների թիվն այս տարի գերազանցել էր 250–ը, որոնք առաջարկել են լուծումների լայն շրջանակ` առողջապահությունից մինչև բնապահպանություն և առևտուր։ –0–