«ԱրմենՏելը» հերքել է առաջնագծում գտնվող զինվորին դատի տալու մասին հրապարակումները
ԵՐԵՎԱՆ, 22 ապրիլի./ԱՌԿԱ/. «ԱրմենՏել» ՓԲԸ–ն (ապրանքանիշը` Beeline) հերքել է առաջնագծում գտնվող զինվորին դատի տալու մասին հրապարակումները։
Երեկ մամուլում հայտնվել են հրապարակումներ այն մասին, որ ‹‹ԱրմենՏել›› ՓԲԸ-ն դատի է տվել առաջնագծում գտնվող զինվորին` պահանջելով 27.820 դրամ։
Ինչպես նշվում է «ԱրմենՏել» ՓԲԸ–ի (ապրանքանիշը` Beeline) գլխավոր տնօրեն Անդրեյ Պյատախինի ուղերձում, հրապարակումը չի համապատասխանում իրականությանը և վարկաբեկում է ընկերության հեղինակությունը։
Նա ներկայացրել է հարցի էությունը` նշելով, որ ՀՀ քաղաքացի Ալբերտ Կարապետյանը դարձել է ընկերության բաժանորդը 2015 թ. մայիսի 18-ին, երբ նա դեռևս զինվոր չէր։ Հաճախորդի պարտքի ընդհանուր գումարն այս պահի դրությամբ կազմում է 27 272 դրամ, որից 20 000 դրամը` «Արծաթե համարի» արժեքն է: 2015 թ. հուլիս ամսից սկսած բաժանորդը դադարել է վճարել կապի ծառայությունների համար, իսկ 2015 թ. օգոստոսին ստացել է առաջին SMS-հաղորդագրությունը պարտքի առկայության և վճարման անհրաժեշտության վերաբերյալ ծանուցմամբ:
«Մամուլի հրապարակումներից տեղեկացանք, որ բաժանորդն արդեն 6 ամիս է ինչ ծառայում է հայոց բանակում, հետևաբար, պարտքի գոյացման պահին նա դեռևս զինվոր չէր: Ընկերությունը 3 անգամ զանգահարել է հաճախորդին և 4 անգամ տեղեկացրել SMS-հաղորդագրության միջոցով՝ պարտքի մարման անհրաժեշտության մասին», – նշել է Պյատախինը։
Պյատախինի խոսքով` այն պահից սկսած, երբ Կարապետյանը դարձել է մեր բաժանորդը և ձևավորվել է նրա պարտքը, ինչպես նաև այն ժամանակահատավածը, երբ գործն ուղարկվել է դատարան, վերջինս դեռ բանակում չէր ծառայում:
«Ցանկանում եմ ընդգծել, որ մինչ ներկա պահը մենք բաժանորդի կամ նրա հարազատների կողմից խնդրի լուծման խնդրանքով որևէ գրավոր–դիմում չենք ստացել և այդ մասին տեղեկացել ենք միայն ԶԼՄ-ների հրապարակումներից», – նշել է ընկերության գլխավոր տնօրենը։
«Այժմ խոսքս ուղղեմ որոշ ԶԼՄ-ների և կայքերի. ցավում եմ, որ մեր և մեր երկրի համար այս ծանր ժամանակաշրջանում դուք շահարկում եք այս ցավալի թեման, օգտագործում եք զինվորի անունը ոչ թե իրականում խնդիրը լուծելու, այլ սեփական վարկանիշը և կայքի այցելությունների քանակը բարձրացնելու նպատակով: Խնդրի լուծման իրական ճանապարհ գտնելու և մեզ հետ կապ հաստատելու փոխարեն, նրանք «աղ են լցնում ժողովրդի վերքերի վրա», խաղում մեր ընկերության հեղինակության հետ, չեն պարզաբանում մանրամասները և նույնիսկ մեկնաբանություն չեն վերցնում երկրորդ կողմից: Նման մոտեցումը համարում եմ խիստ ոչ պրոֆեսիոնալ և ոչ էթիկական», – ընդգծել է Պյատախինը։
Միաժամանակ գլխավոր տնօրենը նշել է, որ նա անձամբ և Beeline աշխատակիցները երկրի համար ծանր պահին համախմբվել են և, ինչպես ողջ հայ ժողովուրդը, օգնություն ցուցաբերել Արցախի ժողովրդին և սահմանի պաշտպաններին:
«Beeline-ի աշխատակիցները հավաքեցին բավականին նշանակալի գումար, որով գնվեցին առաջին անհրաժեշտության իրեր զինվորերի և բանակի համար: Զինվորական գործողությունների արդյունքում զոհվածների տաս ընտանիք, ստացան ֆինանսական օգնություն, իսկ ես անձամբ հանդիպեցի ԼՂՀ նախագահի հետ` քննարկելու այն սոցիալական ծրագրերը, որոնք մեր ընկերությունները կիրականացնի ԼՂՀ տարածքում: Ինչպես արդեն նշեցի, այս ամենը տեղ չէր գտել մամուլում, քանի որ դա չի արվել PR նպատակներով և ցավում եմ, որ կան մարդիկ, ովքեր սեփական PR-ի և վարկանիշի բարձրացման համար օգտագործում են իրենց պաշտպանների` զինվորների հանդեպ հայ ժողովրդի տածած զգացմունքները և հարգանքը», – նշել է Պյատախինը։
Նա ընկերության անունից բոլորին մաղթել է խաղաղություն և վստահություն վաղվա օրվա հանդեպ:
«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ ($1 – 479,13 դրամ)։ -0-