«ԱՌԿԱ» գործակալության թղթակիցն անցել է Ռոստելեկոմի «Տեխնոլոգիաներ կյանքի համար. ավելի շատ հնարավորություններ» մրցույթի երկրորդ փուլ
ԵՐԵՎԱՆ, 25 մայիսի. /ԱՌԿԱ/. «ԱՌԿԱ» գործակալության թղթակից Իննա Վերլինսկայան անցել է լրագրողների համար նախատեսված «Տեխնոլոգիաներ կյանքի համար. ավելի շատ հնարավորություններ» հինգերորդ ամենամյա մրցույթի երկրորդ փուլ, որն անցկացնում են Ռոստելեկոմ ընկերությունն ու ZTE–ին։
Ինչպես երեքշաբթի մամուլի ասուլիսի ժամանակ նշեց «GNC-Alfa» ՓԲԸ-ի գլխավոր տնօրենը` Հայաստանում Ռոստելեկոմի գլխավոր տնօրեն Հայկ Ֆարամազյանը, Ռուսաստանում մրցույթն անցկացվում է արդեն հինգերորդ անգամ, իսկ Հայաստանում` երկրորդ:
Մրցույթն անցկացվում է տեղեկատվական տեխնոլոգիաների և ծառայությունների, տարբեր ոլորտներում կիրառման վերաբերյալ առավել օբյեկտիվ և որակյալ լուսաբանմանը ԶԼՄ-ների և բլոգերների ուշադրությունը հրավիրելու նպատակով: Գլխավոր մրցանակակիրը 2016թ. աշնանը ռուսաստանյան պատվիրակության կազմում կայցելի Չինաստանի Շենչժեն քաղաքում գտնվող ZTE ընկերության գլխամաս: Յուրաքանչյուր տարի նախագծին մասնակցում են ավելի քան 500 ԶԼՄ-ների ներկայացուցիչներ Ռուսաստանից և Հայաստանից։
«Մենք մեծապես կարևորում ենք մրցույթի անցկացումը, քանի որ տեղեկատվական և հեռահաղորդակցական տեխնոլոգիաների ոլորտում լրագրողների հմտությունների զարգացումը կարևոր գործոն է հասարակ օգտատերերին ոլորտի նվաճումների մասին տեղեկատվություն ներկայացնելու հարցում», - ասաց Ֆարամազյանը:
Նրա խոսքով, այս տարի մրցույթին, որը մեկնարկել էր 2015 թ.-ի նոյեմբերին, մասնակցել են վեց հայ լրագրողներ, որոնք ժյուրիի դատին են ներկայացրել 16 աշխատանք: Առաջին փուլում հաղթող են ճանաչվել երեք լրագրողներ` Աննա Քեշիշյանը` «Մի´ նետեք կատրոֆիլի կճեպները» ռեպորտաժով («Արարատ» հեռուստաալիք), Վանուհի Ավագյանը` «Հայաստանը լուրջ մրցակից է դարձել միջազգային տեղեկատվական տեխնոլոգիաների հարթակում» ռեպորտաժով («Երկիր Մեդիա» հեռուստաալիք) և Իննա Վերլինսկայան` «Նոր ArmTab–ն ու Armphone-ը շուտով կհայտնվեն հայկական շուկայում» հոդվածով («ԱՌԿԱ» լրատվական գործակալություն):
Ինչպես նշեց Ֆարամազյանը, երեք հայ լրագրողներն անցել են երկրորդ փուլ, որի ընթացքում նրանց աշխատանքները ռուս լրագրողների աշխատանքների հետ միասին գնահատվելու են միջազգային ժյուրիի կողմից: Նախատեսվում է, որ մրցույթի արդյունքները կամփոփվեն հունիսի սկզբին:
Ինչպես նշեց հայկական ժյուրիի անդամ, «Ձեռնարկությունների ինկուբատոր» հիմնադրամի տնօրեն Բագրատ Ենգիբարյանը, տեղեկատվական և բարձր տեխնոլոգիաների ոլորտը Հայաստանում ակտիվորեն զարգանում է և առաջանում է երկրում համարժեք միջավայրի ստեղծման անհրաժեշտություն:
«Հարկավոր է, որ տեխնոլոգիական ոլորտի բոլոր նվաճումները հասանելի լինեն հասարակայնությանը, և այս հարցում կարևոր դեր են խաղում լրագրողները, որոնք կարող են մատչելի ձևով ներկայացնել ոլորտի բոլոր նվաճումները և ընդլայնել դրա հնարավորությունները», - ասաց Ենգիբարյանը:
Մրցույթի առաջին փուլի արդյունքներն ամփոփելուց հետո բոլոր մասնակիցներին հանձնվել են նվերներ Ռոստելեկոմի կողմից` երեք ամսվա բաժանորդագրությամբ «Smartbox», որը հնարավորություն է ընձեռում դիտել Smart հեռուստատեսություն ցանկացած վայրում, որտեղ կա ինտերնետ և հեռուստատեսություն:
Ռուս լրագրողների շրջանում անցկացվող մրցույթն ունի հինգ տարվա պատմություն, և 2015 թ.-ին հայ լրագրողների մասնակցությունը մրցույթին միջազգային կարգավիճակ հաղորդեց:
2014-2015 թ.-ին Հայաստանից հաղթող է ճանաչվել Հայկուհի Ասատրյանը, որը ռուս լրագրողների հետ միաին այցելել է Չինաստանի Շենչժեն քաղաքում գտնվող Huawei ընկերության գլխամաս:
Ծրագիրը կազմակերպել է «Ռոստելեկոմը`» ZTE ընկերության հետ համագործակցությամբ և առաջատար ԶԼՄ-ների տեղեկատվական աջակցությամբ: -0-