Ադրբեջանցի հակերները կոտրել են մոտ 300 հայկական կայքեր. փորձագետ
ԵՐԵՎԱՆ, 26 փետրվարի. /ԱՌԿԱ/. Ադրբեջանցի հակերները նախօրեին գիշերը կոտրել են մոտ 300 հայկական կայքեր, Facebook սոցցանցի իր էջում տեղեկացրել է տեղեկատվական անվտանգության փորձագետ Սամվել Մարտիրոսյանը։
«Նախնական տվյալներով` ադրբեջանցի հակերներին հաջողվել է վերահասցեավորել DNS համակարգը ADC ընկերության սերվերի վրա։ Այս ամենի հետևանքով մոտ 300 հայկական կայքեր կոտրվել են», – տեղեկացրել է Մարտիրոսյանը։
Փորձագետի խոսքերով` կայքերը վերականգնելու համար ժամանակ կպահանջվի։
Նախօրեին Մարտիրոսյանը Facebook–ի իր էջում տեղեկացրել էր, որ Antiarmenia ադրբեջանական հակերային խումբը հայտարարել է փետրվարի 26–ին հայկական կայքերը կոտրելու մտադրության մասին Խոջալուի դեպքերի կապակցությամբ։ Նա տեղեկացրել էր, որ հայ հակերները ևս պատրաստվում են գրոհել ադրբեջանական կայքերը` կապելով դա Սումգայիթի ջարդերի հետ։ –0–