Հայաստանի ՏՀՏ առաջնորդներն Աղվերանում կքննարկեն ոլորտի ռազմավարությունը 2016 թ.–ին
ԵՐԵՎԱՆ, 30 նոյեմբերի. /ԱՌԿԱ/. «ՏՀՏ առաջնորդների հանդիպում» համաժողովը կանցկացվի դեկտեմբերի 12–13–ը Աղվերանում, հաղորդում է Ինֆորմացիոն տեխնոլոգիաների ձեռնարկությունների միությունը (UITE)։
Համաժողովի մասնակիցները կքննարկեն տեղեկատվական և հեռահաղորդակցական տեխնոլոգիաների ոլորտի ռազմավարությունն ու 2016 թ.–ի գործունեության ծրագիրը։ Համաժողովի օրակարգի հիմնական թեմաներից են նաև ՏՀՏ ոլորտում կրթությանը վերաբերող հարցերը, այդ թվում ` էլեկտրոնային կրթությունը, գիտահետազոտական աշխատանքների ներառումը համալսարանական համակարգում, Հայաստանի հանրակրթական համակարգում ինժեներային խմբակ–լաբորատորիաների ստեղծումը։
Համաժողովի մասնակիցները կքննարկեն նաև դեռ մեկ տարի առաջ ընդունած Why Armenia ռազմավարությունը, մասնավորապես, հայկական բարձր տեխնոլոգիական ապրանքանիշի զարգացման նպատակով գործնական առաջարկներն ու գործողությունների ծրագիրը։ Կներկայացվի նաև այդ ոլորտում Volo ընկերության աշխատանքի փորձը։
UITE–ն նման հանդիպումներ է կազմակերպում 2007 թ.–ից տարվա ընթացքում մի քանի անգամ` ոլորտի առավել ակտուալ թեմաների քննարկման և համատեղ քայլերի, ինչպես նաև կառավարությանը ներկայացվող առաջարկների մշակման նպատակով։ Համաժողովին ավանդաբար մասնակցում են ինչպես Հայաստանի ՏՏ փոքր և միջին բիզնեսի, ինչպես նաև պետական կառույցների ներկայացուցիչներ։ –0–