Ռոստելեկոմը կօգնի հեռահաղորդակցության զարգացմանը Աբովյան քաղաքում
ԵՐԵՎԱՆ, 22 հուլիսի. /ԱՌԿԱ/. «Ռոստելեկոմ» ընկերությունը ի դեմս «GNC-ALFA» հայկական դուստր ձեռնարկության, և Աբովյանի քաղաքապետարանը փոխըմբռնման հուշագիր են ստորագրել համայնքի և հեռահաղորդակցության զարգացման վերաբերյալ, հայտնում է ընկերության մամուլի ծառայությունը։
«Հուշագիրը նպատակ ուներ զարգացնելու քաղաքային համայնքի ենթակառուցվածքները, ապահովելու շրջակա միջավայրի պահպանության և Աբովյան քաղաքի կենսամակարդակի բարձրացման հիմնախնդիրները։ Մասնավորապես, Ռոստելեկոմի կողմից կբարեկարգվեն ու անվճար WiFi ցանցով կապահովվեն համայնքային զբոսայգիները», – նշված է հաղորդագրության մեջ։
Ինչպես հայտնում է ընկերության մամուլի ծառայությունը, Աբովյանի նորանշանակ քաղաքապետ Վահագն Գևորգյանը նշել է մասնավոր հատվածի հետ համագործակցության կարևորությունը` ավելացնելով, որ ընկերության ներգրավվածությունը համայնքի զարգացման գործում էապես կնպաստի տեղի ենթակառուցվածքների զարգացմանը։
Իր հերթին «GNC-ALFA» ՓԲԸ–ի գլխավոր տնօրեն Հայկ Ֆարամազյանն ընդգծեց ընկերության կողմից կորպորատիվ սոցիալական պատասխանատվության շրջանակներում շարունակական իրականացվող նախագծերի կարևորությունը` ավելացնելով, որ Աբովյան քաղաքում տեղակայված է Ռոստելեկոմի գլխամասային գրասենյակը և նմանօրինակ աշխատանքները նպաստավոր պայմաններ են ստեղծում նաև ընկերության համար։
2014 թվականից անվճար ինտերնետ կապով են ապահովված Աբովյան քաղաքի յոթ նախակրթարաններ, գեղարվեստի, երաժշտական և շախմատի դպրոցները, սպորտի և մշակույթի համալիր կենտրոնը, համայնքային գրադարանը, մանկապատանեկան ստեղծագործական կենտրոնը, սբ. Հովհաննես Մկրտիչ եկեղեցու և ընկերության գրասենյակների հարակից տարածքները։
Ռոստելեկոմը Հայաստանում ակտիվ համագործակցում է համայնքների հետ ի նպաստ տեղի բնակչության կենսամակարդակի և ենթակառուցվածքների զարգացման։ Նման նախագծեր են իրականացվում նաև Երևանի, Կապանի, Վանաձորի և Դիլիջանի քաղաքապետարանների հետ։
«Ռոստելեկոմը» Ռուսաստանում գործող դինամիկ զարգացող խոշորագույն հեռահաղորդակցական խումբ է, որը ծառայություններ է տրամադրում ոլորտի շուկայի բոլոր հատվածներում։ Ընկերությունն առաջատար դիրք է զբաղեցնում լայնաշերտ ինտերնետ հասանելիության և վճարովի հեռուստատեսության ռուսական շուկայում։ Այժմ ընկերության բջջային կապի բաժանորդների թիվը կազմում է ավելի քան 13 մլն մարդ։
Հայկական շուկայում «Ռոստելեկոմ» ԲԲԸ–ն ներկայացնում է «GNC-ALFA» դուստր ընկերությունը, որը Rostelecom ապրանքանիշի ներքո Հայաստանի տարածքում իրականացնում է ծառայություններ առաջխաղացում և վաճառք։ 2012 թ.–ի վերջին Rostelecom–ն իր բաժանորդներին առաջարկեց գերարագ ինտերնետ և IP հեռուստատեսության ու հեռախոսակապի ծառայություններ։ -0-