Ucom-ի աշխատակիցները պարգևատրվել են հայրենիքին մատուցած ծառայությունների համար
ԵՐԵՎԱՆ, 14 սեպտեմբերի./ԱՌԿԱ/. 2021 թվականի օգոստոսի 9-ին Ucom-ի անվտանգության բաժնի ղեկավար Արամ Սարգսյանին շնորհվել է «Երախտագիտություն» մեդալը Արցախի Հանրապետության նախագահ Արայիկ Հարությունյանի կողմից, հաղորդում է Ucom ընկերության մամուլի ծառայությունը։
Նման մեդալով պարգևատրվում են այն անձինք, ովքեր ծանրակշիռ ավանդ են ունեցել ԼՂՀ տնտեսության, գիտության, մշակույթի, սոցիալական ոլորտի վերականգնման և զարգացման գործում, նպաստել ԼՂՀ պաշտպանությանն ու միջազգային ճանաչմանը։
Ավելի ուշ՝ սույն թվականի սեպտեմբերի 2-ին, ՀՀ արտակարգ իրավիճակների նախարար Անդրանիկ Փիլոյանի կողմից Ucom-ի աշխատակից Ա․Սարգսյանն արժանացել է նաև «Համագործակցություն հանուն փրկության» մեդալի։
Ավելին, 2020 թվականի դեկտեմբերի 15-ին տվյալների կենտրոնների և ենթակառուցվածքների թիմի ավագ ինժեներ Կարեն Մելյանին ՀՀ ՊՆ N զորամասի հրամանատարի կողմից շնորհվել է շնորհակալագիր՝ հայրենիքի սահմանների պաշտպանության ընթացքում ցուցաբերած տոկունության, արիության և հայրենանվեր գործունեության համար։
«Ucom-ում մենք կարևորում ենք երկրին օգտակար լինելու ոչ միայն թիմային ջանքերը, այլև յուրաքանչյուր աշխատակցի անհատական ներդրումը։ Պատիվ է աշխատել այսպիսի նվիրյալների հետ, ովքեր իրենց անձնական օրինակով են ոգեշնչում բոլորիս անել առավելագույնը»,- նշել է Ucom ընկերության Մարդկային ռեսուրսների կառավարման և զարգացման գծով տնօրեն Վիկտորյա Բաղդասարյանը։
Ucom հայկական ընկերությունը (Universal Communications) հիմնադրվել է 2007թ.–ին։ Ucom–ը, լինելով Հայաստանի հեռահաղորդակցական շուկայի առաջատարներից մեկը, տրամադրում է ոլորտի ծառայությունների ամբողջ շրջանակը` գերարագ սիմետրիկ ինտերնետ, IP հեռուստատեսություն, թվային հեռախոսակապ։–0–