«ՆերՈւժ» սփյուռքի տեխնոլոգիական ստարտափների ծրագրի երկու մասնակից ինկուբացիոն շրջան կանցնի Beeline ստարտափ ինկուբատորում
ԵՐԵՎԱՆ, 25 դեկտեմբերի./ԱՌԿԱ/. Հայաստանում ամփոփվել են Դիլիջանի UWC միջազգային դպրոցում տեղի ունեցած «ՆերՈւժ» սփյուռքի տեխնոլոգիական ստարտափների ծրագրի արդյունքները, հաղորդում է Beeline ընկերության մամուլի ծառայությունը։
ՀՀ բարձր տեխնոլոգիական արդյունաբերության նախարարության և ՀՀ սփյուռքի գործերի գլխավոր հանձնակատարի գրասենյակի կողմից իրականացվող ծրագրին միացել են Հայաստանի ստարտափ էկոհամակարգի գրեթե բոլոր ներկայացուցիչները, այդ թվում և Beeline ստարտափ ինկուբատորը:
«ՆերՈւժ» 2019-ին մասնակցում էին 17 երկրից ընտրված 47 տեխնոլոգիական ստարտափների 80 ներկայացուցիչներ:
Ստարտափաշատ Դիլիջանում հայրենադարձ թիմերի համար նախատեսված էին հայ և այլազգի ՏՏ լավագույն մասնագետների հետ զրույցներ, մենթորային հանդիպումներ, պանելային քննարկումներ և խորհրդատվական ժամեր։
Գաղափարի մակարդակում գտնվող երեք հաղթողներն են՝ «Marathon», «eBin», «SoFetch» թիմերը, որոնք ստացան $15.000, $20.000 և $25.000 դրամաշնորհ, իսկ շուկա դուրս գալու պատրաստ 3 ստարտափները՝ «Schedex»-ը, «Garoon Tech»-ը և «Fact industries»-ը համապատասխանաբար ստացան $20.000, $25.000 և $30.000 պարգևներ։
Մրցանակաբաշխության օրը Հայաստանում Beeline-ը նույնպես նախատեսել էր հատուկ մրցանակ. Beeline ստարտափ ինկուբատորի թիմի կողմից ընտրվեց 2 ստարտափ՝ Craft Lab և Schedex, որոնք ստացան առանց մրցույթի անվճար մասնակցության հնարավորություն ինկուբատորի 6-րդ շրջափուլին։
Նրանց նաև մրցանակ տրվեց ինկուբատորն ավարտած ստարտափների կողմից՝ Eventor.am, 4u.am, EasyDMARC, GuideMe և SendSMS, որոնց ծառայություններից անվճար կկարողանան օգտվել։
«Մենք ուրախ ու հպարտ ենք այս ծրագրի մասնակիցը լինել, քանի որ ստարտափներին աջակցության մեր քաղաքականության վերջնական նպատակը հենց Հայաստանի տնտեսական զարգացման աջակցելն է: Մենք այս ծրագրերն իրականացնում ենք, որպեսզի մեր երիտասարդները կարողանան հեշտությամբ բիզնես հիմնել Հայաստանում, իսկ այժմ նաև Սփյուռքից երիտասարդները շահագրգռված կլինեն Հայաստան գալու մեջ», - նշել է Հայաստանում Beeline-ի գլխավոր տնօրեն Անդրեյ Պյատախինը:
Ի դեպ, Beeline ստարտափ ինկուբատորի ռեզիդենտ ստարտափներից երեքը՝ Rendchain-ը, Garoon Tech-ը և GuideMe-ն, որոնց թիմերում կան սփյուռքահայ անդամներ, «ՆերՈւժ»-ի լավագույն ֆինալիստների շարքում էին։ Garoon Tech-ն արժանացավ 2-րդ մրցանակի և հովանավորների կողմից այլ նվերների։
«ՆերՈւժ» ծրագրի հիմնական նպատակն է՝ Սփյուռքից տաղանդավոր ձեռներեցների, ինժեներների ներգրավումը, հայրենադարձության խթանումը, ինչպես նաև Հայաստանում ստարտափ էկոհամակարգի զարգացումը: Ծրագիրը հնարավորություն է ստեղծելու արտերկրում ապրող հայերի տեխնոլոգիական գաղափարները և նախագծերը Հայաստանում բիզնեսի վերածելու և գլոբալ շուկաներ դուրս գալու համար:
«ՎԵՈՆ Արմենիա» ՓԲԸ-ն (Beeline ապրանքանիշ) «ՎԵՈՆ» ընկերությունների խմբի մի մասն է, որն աշխարհի խոշորագույն ինտեգրված օպերատորներից մեկն է: 2007թ.–ի ապրիլից «ՎԵՈՆ Արմենիա» ՓԲԸ–ի 100% –ը (ավելի վաղ «ԱրմենՏել» ՓԲԸ) պատկանում է Veon ընկերությունների խմբին։ «ՎԵՈՆ Արմենիան» տրամադրում է ֆիքսված և բջջային կապի ծառայություններ։–0–