Հայաստանը ՄԱԿ-ի երկրների Էլեկտրոնային կառավարման զարգացման ցուցիչ 2020-ում 2018թ.-ի համեմատ իր դիրքերը բարելավել է 19 կետով (ՖՈՏՈ)
ԵՐԵՎԱՆ, 17 հուլիսի․ /ԱՌԿԱ/․ Հայաստանը ՄԱԿ-ի երկրների Էլեկտրոնային կառավարման զարգացման ցուցիչ 2020-ում 2018թ.-ի համեմատ իր դիրքերը բարելավել է 19 կետով։ Այս մասին Facebook-յան իր էջում հայտնել է ՀՀ փոխվարչապետ Տիգրան Ավինյանը։
«Ուրախ եմ տեղեկացնել, որ ՄԱԿ-ը հրապարակել է երկրների Էլեկտրոնային կառավարման զարգացման ցուցիչ 2020-ը, որտեղ Հայաստանը 2018թ.-ի համեմատ իր դիրքերը բարելավել է 19 կետով՝ 193 երկրների շարքում զբաղեցնելով 68-րդ տեղը։
Իսկ դեպի ծով ելք չունեցող երկրների շարքում Հայաստանը աշխարհում երկրորդն է՝ զիջելով միայն Ղազախստանին»,- գրել է նա։
ՄԱԿ-ի էլեկտրոնային կառավարման 2018թ. հետազոտության համաձայն Հայաստանը Էլեկտրոնային կառավարման զարգացման ցուցիչում ուներ 0.5944 ցուցանիշ, մինչդեռ 2020թ. այն արդեն 0.7136 է։
Ավինյանը նշել է նաև, որ հետազոտության արդյունքներով Հայաստանը էլեկտրոնային մասնակցության ցուցիչով նույնպես զգալիորեն բարելավել է դիրքերը 2018 թվականի համեմատ՝ արդյունքում ընդգրկվելով ամենաբարձր վարկանիշ ունեցող երկրների խմբում:-0-