Beeline–ը պարզաբանում է 2018թ.–ի ֆինանսական հաշվետվության հետ կապված իրավիճակը

ԵՐԵՎԱՆ, 4 փետրվարի./ԱՌԿԱ/. Beeline–ը Հայաստանում պարզաբանում է ներկայացրել կապված 2018թ.–ի ֆինանսական հաշվետվության հետ։

«Ի պատասխան ստացած հարցումների, որոնք կապված են ընկերության 2018 թ. ֆինանսական հաշվետվությունների հետ, ցանկանում ենք տեղեկացնել. ըստ ֆինանսական հաշվետվությունների միջազգային ստանդարտների (IFRS)՝ ընկերությունները պարտավոր են պարբերաբար անցկացնել երկարատև հեռանկարում իրենց ապագա դրամական հոսքերի գնահատում և ստացած տվյալներն արտացոլել ֆինանսական հաշվետվություններում։ Որպես միջազգային խմբի մի մաս, ընկերությունը հետևողական է մոտեցել այդ պահանջին և, հաշվի առնելով հեռահաղորդակցության ոլորտի համաշխարհային միտումները ու մեր շուկայի իրողությունները, շատ խիստ է գնահատել իր ակտիվների արժեքի ապագա հնարավոր անկումը։ Հետևաբար 2018 թ. մենք վերանայեցինք մեր գնահատականները և ավելի պահպանողական մոտեցում ցուցաբերեցինք: Համապատասխանաբար, դա արտացոլվեց ֆինանսական հաշվետվություններում, որպես լրացուցիչ կանխատեսումային ծախս, որը փաստացի տեղի չի ունեցել», – նշվում է Beeline–ի տարածած հաղորդագրության մեջ։

Ինչ վերաբերում է փաստացի տարեկան գործառնական ցուցանիշներին, ապա 2018 թ. դրամական զուտ հոսքերը դրական են, իսկ շահույթը՝ նախքան տոկոսը, հարկերը, մաշվածությունը և ամորտիզացիան (EBITDA) կազմել է 8,6 մլրդ AMD:

«Հավելենք նաև, որ 2019 թ. Հայաստանում Beeline-ն ընդգրկվել է խոշոր հարկատուների տասնյակում», – հայտնում են Beeline–ից։

«ՎԵՈՆ Արմենիա» ՓԲԸ-ն (Beeline ապրանքանիշ) «ՎԵՈՆ» ընկերությունների խմբի մի մասն է, որն աշխարհի խոշորագույն ինտեգրված օպերատորներից մեկն է: 2007թ.–ի ապրիլից «ՎԵՈՆ Արմենիա» ՓԲԸ–ի 100% –ը (ավելի վաղ «ԱրմենՏել» ՓԲԸ) պատկանում է Veon ընկերությունների խմբին։ «ՎԵՈՆ Արմենիան» տրամադրում է ֆիքսված և բջջային կապի ծառայություններ։–0–