Ամբողջ աշխարհում Windows համակարգերի գլոբալ խափանում․ խափանվել է նաև ԱՄՆ-ի, ԵՄ-ի և Ավստրալիայի ավիաընկերությունների աշխատանքը

ԵՐԵՎԱՆ, 19 հուլիսի․/ԱՌԿԱ/․ Windows համակարգով աշխատող սարքերի խափանում է տեղի ունեցել ամբողջ աշխարհում: Ըստ Register-ի, դա պայմանավորված է CrowdStrike տեղեկատվական անվտանգության լուծումների մատակարարի թարմացման սխալով:

Օգտատերերը բողոքում են, որ Windows 10 օպերացիոն համակարգի սարքերում հայտնվում է «մահվան կապույտ էկրան», գրում է ՌԲԿ–ն։

Խափանումները կրում են գլոբալ բնույթ։ Բացի ամերիկյան հրատարակություններից, Windows–ի խափանման մասին է հայտնում նսև ABC News ավստրալական հեռարձակողը։

Forbes-ի, The Economic Times-ի և CNN-ի տվյալներով՝ ԱՄՆ-ի, ԵՄ-ի, Ավստրալիայի և այլ երկրների ավիաընկերություններում համատարած խափանումներ են, ինչը կարող է պայմանավորված լինել Windows օպերացիոն համակարգի անսարքության հետ ։

Մասնավորապես, ամերիկյան խոշորագույն ավիաընկերությունները՝ American Airlines-ը, United Airlines-ը, Delta Airlines-ը և Frontier Airlines-ն արդեն հայտարարել են խափանման պատճառով թռիչքների դադարեցման մասին։ Թուրքիայի խոշորագույն ավիաընկերությունը՝ Turkish Airlines-ը, նույնպես հայտնել է գլոբալ խափանման մասին, որը խնդիրներ է առաջացրել տոմսերի ամրագրման և գրանցման հետ: 

Ինչպես հայտնում է CNN-ը, թռիչքների չեղարկման ու ուշացումների պատճառը Microsoft Azure տվյալների պահպանման ամպային հարթակի խափանումն է։