8-րդ Բարքեմփ Երևան (չ)կոնֆերանսը կմիավորի ավելի քան 2000 ՏՏ մասնագետների
ԵՐԵՎԱՆ, 17 հունիսի. /ԱՌԿԱ/. Երիտասարդական (չ)կոնֆերանս «Բարքեմփ Երևան 2016»-ը, որը կկայանա հունիսի 18-19–ը Երևանում, կմիավորի ավելի քան 2000 մեդիա և ՏՏ ոլորտի մասնագետների։
Ինչպես հայտնեցին Հայաստանի ինֆորմացիոն տեխնոլոգիաների ձեռնարկությունների միությունում, արդեն 8-րդ տարին անընդմեջ անցկացվող յուրահատուկ՝ ոչ պաշտոնական ձևաչափով կոնֆերանսի մասնակիցներն այս տարի կրկին հնարավորություն կունենան նոր գիտելիքներ և հմտություններ ձեռք բերել, ելույթներ ունենալ, կիսվել սեփական փորձով:
Այս տարի ևս «Բարքեմփ Երևան 2016»-ի ընթացքում բացի ելույթներից սպասվում են վարպետության դասընթացներ և աշխատաշուկա՝ ՏՏ ոլորտի մասնագետների համար:
(Չ)կոնֆերանսին այս տարի ելույթներով հանդես կգան չորս միջազգային հյուրեր՝ Yandex Taxi նախագծի մարքետինգի տնօրեն՝ Դանիլ Շուլեյկոն, SMM մասնագետ՝ Անդրեյ Ֆռոլչենկովը, Jumpstart մեդիա ընկերության գործադիր տնօրեն՝ Էրիկ Բարեթը, Ինտերնետի և մարդու իրավունքների կենտրոնի գործադիր տնօրեն՝ Իոհաննա Բրոնովսկին:
Արդեն 3 տարի շարունակ ԲարՔեմփ Երևան 2016-ի գլխավոր գործընկերն է Ucom ընկերությունը: Հովանավորներն են՝ Workfront Armenia, SFL LLC, BetConstruct, PicsArt, Synergy, Insider, Simply Technologies ընկերությունները: (Չ)կոնֆերանսի աջակիցներն են նաև Հայաստանի ամերիկյան համալսարանը, Մեդիա նախաձեռնությունների կենտրոնը, TMS Burger-ը: Ինֆորմացիոն գործընկերներն են Մեդիամաքս գործակալությունը, IP Marketing ընկերությունը և Startup Armenia-ն:
(Չ)կոնֆերանսին մասնակցելու համար անհրաժեշտ է գրանցվել ԲարՔեմփ Երևանի կայքում՝ www.barcamp.am: Բարքեմփ Երևանը կարելի է գտնել Facebook-ում` https://www.facebook.com/barcampevn, Twitter-ում` @barcampam, Instagram-ում` https://www.instagram.com/barcamp_yerevan/: (Չ)կոնֆերանսի պաշտոնական հեշթեգն է #barcampevn16-ը:
ԲարՔեմփը ոչ ֆորմալ մթնոլորտում բաց քննարկումներ և մտքերի ազատ փոխանակում ապահովող միջոցառման ձևաչափ է: ԲարՔեմփ Երևան միջոցառումներն ամբողջությամբ կազմակերպվում են կամավորների ջանքերով, ովքեր հայաստանյան տեղեկատվական տեխնոլոգիաների և մեդիա ոլորտի ներկայացուցիչներ են: Հայաստանում Բարքեմփն անցկացվում է 2009թվականից: Առաջին Բարքեմփ Երևանի մասնակիցների թիվը տատանվում էր 200-ից 300-ի սահմաններում, իսկ 7 տարի անց՝ գերազանցեց 2000-ը: -0-