3G տեխնոլոգիա է ներդրվել Ղարաբաղում
ՍՏԵՓԱՆԱԿԵՐՏ, 24 հունիսի. /ԱՌԿԱ/. Քայլեր կատարելով դեպի տեղեկատվական տեխնոլոգիաների միջազգային չափանիշներ և արձագանքելով Արցախի հաճախորդի պահանջներին՝ Ղարաբաղ Տելեկոմը այսուհետ տրամադրում է երրորդ սերնդի ցանց (3G), որը ենթադրում է շարժական ինտերնետ ծառայության հասանելությունը Արցախի տարածքում, տեղեկացվում է ընկերության կայքում։
Ստեփանակերտի «Vallex Garden Hotel» հյուրանոցում տեղի ունցեած հանդիսավոր արարողության ժամանակ ընկերությունը ներկայացրել է նորացված կորպորատիվ ոճով իր նոր արտադրանքը։
«Այսուհետ Արցախի օգտատերը համացանցում շարունակաբար աճող տեղեկատվությունից օգտվելու և աշխարհի ու մտերիմների հետ կապ պահպանելու լայն հնարավորություններ ունի: Առաջարկվում են շարժական ինտերնետի կանխավճարային և հետվճարային սակագնային փաթեթներ»,– նշվում է հաղորդագրության մեջ։
Ըստ Ղարաբաղ Տելեկոմ ընկերության խորհրդի նախագահ Պիեռ Ֆատտուշի` աշխարհը զարգանում է արագ քայլերով, և Արցախը չպետք է ետ մնա այս միտումից:
«Այս տեսլականն ունենալով՝ Ղարաբաղ Տելեկոմ ընկերությունը գործարկեց երրորդ սերնդի ցանցը՝ աջակցելով Արցախին առաջատար դիրք զբաղեցնել տեղեկատվական տեխնոլոգիաների աշխարհի քարտեզին: Այժմ Արցախի բնակչությունը 3G ցանցի միջոցով աշխարհի հետ կապ հաստատելու առավել մեծ հնարավորություններ ունի, որի շնորհիվ այստեղ կարող են զարգանալ և առաջարկվել բազմաթիվ նորարար ծառայություններ: Այս գեղեցիկ և հոգեհարազատ երկրում մեր կատարած ներդրումների գերնպատակը միայն լավագույնն առաջարկելն է», - նշել է նա։
Արարողությանը ներկա էին նաև Ղարաբաղ Տելեկոմ ընկերության հիմնադիր անդամներ, ղեկավարներ, բիզնես ոլորտի ներկայացուցիչներ, պետական բարձրաստիճան հյուրեր, ովքեր ողջունեցին առաջատար ծառայությունների մեկնարկը:
Բջջային ինտերնետ ծառայության համար, որը հասանելի է դեռ Ստեփանակերտում և հանրապետության մարզային կենտրոններում, ներբեռնման մինչև 3 ՄԲ/վ արագություն է ապահովվել։
Ղարաբաղ Տելեկոմ ընկերությունը հիմնվել է 2002 թվականին՝ պարոն Ֆատուշի նախաձեռնությամբ: 2002թ-ի հոկտեմբերից ընկերությունը սկսել է տրամադրել ինտերնետի ծառայություններ Ստեփանակերտում, իսկ 2003թ-ից՝ բոլոր շրջաններում: Մեկնարկից կարճ ժամանակ անց ընկերությունը բացել է նաև առաջին ինտերնետ-սրահը: Այժմ շարժական ինտերնետի երրորդ սերնդի ցանցի շնորհիվ Արցախի բնակիչները կարող են հաղորդակցվել առանց տարածքային սահմանափակման: –0–