Իլոն Մասկը պատրաստվում է ստեղծել ռոբոտների բանակ
ԵՐԵՎԱՆ, 26 մարտի․/ԱՌԿԱ/․ Tesla կորպորացիայի գլխավոր տնօրեն Իլոն Մասկը հայտարարել է մինչև 2025 թվականի վերջը 5 հազար Optimus ռոբոտ արտադրելու պլանների մասին։
Մասկը Tesla-ի եռամսյակային արդյունքների ներկայացման ժամանակ նշել է, որ մեծ ձեռքբերում կհամարի, եթե Tesla-ն իրացնի նախատեսված 10 հազար նմուշների կեսը։ Միաժամանակ նա հավելել է, որ նույնիսկ 5 հազար ռոբոտը հռոմեական լեգեոնի չափ է, որը տարբեր ժամանակներում կարող էր ընդգրկել երկուից մինչև 10 հազար զինվոր, գրում է Gazeta.ru-ն։
«Կարծում եմ, որ մենք բառացիորեն կկառուցենք լեգեոն. առնվազն ռոբոտների մեկ լեգեոն այս տարի, իսկ հետո գուցե 10 լեգեոն հաջորդ տարի», - ասել է Մասկը։
Նա նշել է, որ ռոբոտների արտադրությունը Tesla-ի համար գործունեության բոլորովին նոր ուղղություն է, ինչի կապակցությամբ ընկերությունն անխուսափելիորեն բախվում է սխալների հետ։ Այնուամենայնիվ, նա այս ռոբոտներն անվանել է Tesla-ի ամենահեռանկարային ակտիվը՝ ընդգծելով, որ դժվար է գերագնահատել խելացի մարդանման ռոբոտների ստեղծման կարևորությունը, որոնք ունակ են ընկալել շրջակա միջավայրը և կատարել հանձնարարված խնդիրները:
Մարտի 15-ին Մասկը հայտնել է, որ Tesla-ի արտադրած Optimus ռոբոտով տիեզերանավը Մարս կթռչի 2026 թվականի վերջին։ Նրա խոսքով, եթե այս թռիչքը հաջող լինի, ապա կարմիր մոլորակի վրա մարդկանց վայրէջքը կարող է սկսվել արդեն 2029-2031 թվականներին։ Նախկինում Ռուսաստանը Մասկին առաջարկել էր միասին տիեզերագնացներ ուղարկել Մարս։