Վրաստանից դեպի հարակից երկրներ ինտերնետ կմատակարարվի Ucom ընկերության օպտիկամանրաթելային ցանցի միջոցով
ԵՐԵՎԱՆ, 3 ապրիլի. /ԱՌԿԱ/. Հայկական «Ucom» և վրացական «Caucasus Online» ընկերությունները կնքեցին պայմանագիր, որի համաձայն «Ucom» ընկերության մալուխների միջոցով Վրաստանից դեպի հարակից երկրներ կմատակարարվի 40 գիգաբայթ թողունակությամբ ինտերնետ, «ԱՌԿԱ» գործակալությանը հայտնեցին ընկերության մամուլի ծառայությունից։
«Համագործակցությունը հնարավորություն է ստեղծում, որ Հայաստանի միջոցով ինտերնետ մատակարարվի այլ երկրներ: Այս համատեղ նախագծի իրականացումը հնարավոր է դառնում Ucom ընկերության կառուցած գերհզոր օպտիկամանրաթելային ցանցի շնորհիվ: Այսպիսով մեծանում է Հայաստանի դերը Եվրոպայից դեպի Մերձավոր և Միջին Արևելք ինտերնետի մատակարարման գործընթացում, քանզի Հայաստանը դառնում է կապող օղակ վերջիններիս միջև»,- նշեց «Ucom» ընկերության տնօրեն Հայկ Եսայանը:
«Ucom»-ը հիմնադրվել է 2007թ-ին: Ընկերությունը տրամադրում է ավանդական և գերժամանակակից որակյալ ծառայություններ Հայաստանի հեռահաղորդակցության շուկայում: Մեկ ընդհանուր մալուխով առաջարկում է հեռահաղորդակցության 3 բազմաֆունկցիոնալ ծառայություններ՝ ինտերնետ, IP հեռուստատեսություն և նոր սերնդի թվային հեռախոսակապ: --0—