«ВКонтакте»-ի նոր գլխավոր տնօրեն է դարձել Բորիս Դոբրոդեևը
ԵՐԵՎԱՆ, 18 սեպտեմբերի. /ԱՌԿԱ/. Բորիս Դոբրոդեևը նշանակվել է ռուսական խոշոր «В Контакте» սոցիալական ցանցի գլխավոր տնօրենի պաշտոնում, Անդրեյ Ռոգոզովը դարձել է գործառնությունների տնօրեն։ Այդ մասին հաղորդում է Lenta.ru-ն` հղում անելով ընկերության մամուլի ծառայությանը։
Դոբրոդեևը պատասխանատու կլինի ընկերության ռազմավարության մշակման, ֆինանսական և առևտրային գործունեության համար։ Ռոգոզովը կղեկավարի ապրանքի զարգացման գործը և կգլխավորի ընկերության գործունեության բոլոր ապրանքային և տեխնոլոգիական ուղղությունները։
Դոբրոդեևն ընկերություն եկել է 2013 թ. նոյեմբերին և զբաղեցրել գլխավոր տնօրենի առաջին տեղակալի պաշտոնը։ Ռոգոզովն ընկերությունում է 2007 թվականից և վերջին տարիներին ղեկավարել է «ВКонтакте»-ի ծառայությունների մշակումների գործընթացները։ -0-