ԵՐԵՎԱՆ, 24 հուլիսի. /ԱՌԿԱ/. Ucom-ի ինտերնետ կապի խափանումներն ամբողջովին վերացվել են, հինգշաբթի հայտնում է ընկերության մամուլի ծառայությունը։

Նախօրեին Վրաստանում ժամը 20։20–ի սահմաններում վնասվել էր Եվրոպան Հայաստանի հետ միացնող գլխավոր մալուխը, որի պատճառով ընդհատվել էր ինտերնետ կապը։

«Մեր ընկերության մասնագետները, ինչպես նաև վրացական կողմի մասնագետները գիշերվա ընթացքում վերականգնել են մալուխի ամբողջականությունը։ Այժմ Ինտերնետ կապը հասանելի է բոլոր բաժանորդներին։ Այնուամենայնիվ, եթե կան բաժանորդներ, ովքեր ինտերնետ–կապի խափանումներ ունեն, խնդրում ենք զանգահարել մեր բաժանորդների աջակցության կենտրոն 011 444 444»,- ասված է ընկերության տարածած հայտարարությունում։

Ucom (Universal Communications, ունիվերսալ կապ) ընկերությունը հիմնադրվել է 2007 թվականին և զբաղվում է հեռահաղորդակցային ծառայությունների մատուցմամբ։ Ericsson–ի օժանդակությամբ, ընկերությունը ստեղծել է լայնաշերտ հասանելիության ցանց` մատուցելով ինտերնետ, IP-հեռուստատեսության և ֆիքսված հեռախոսակապի ծառայություններ։ –0—