OpenAI-ը կթողարկի ԱԲ աջակցությամբ աշխատող սեփական բրաուզերը

ԵՐԵՎԱՆ, 11 հուլիսի․/ԱՌԿԱ/․  OpenAI-ը  պատրաստվում է թողարկել արհեստական ​​բանականությամբ աշխատող վեբ զննարկիչ, որը մարտահրավեր կնետի Google Chrome-ին, հաղորդում է RBC-ն՝ հղում անելով Reuters-ին: Երեք աղբյուրների համաձայն, հավելվածը նախատեսվում է թողարկել առաջիկա շաբաթներին:

OpenAI-ի բրաուզերի ինտերֆեյսը նախագծված է այնպես, որ օգտագործողի գործողությունների մի մասն իրականացվի ChatGPT-ի նման չաթում՝ առանց երրորդ կողմի կայքեր մուտք գործելու:

Chrome-ը խիստ կարևոր է Google-ի բիզնեսի համար, իսկ մրցակից բրաուզերի գործարկումն սպառնում է կորպորացիային, նշում է Reuters-ը: Ինչպես բացատրում է գործակալությունը, սեփական բրաուզերը թույլ է տալիս Google-ին ավելի շատ տեղեկություններ հավաքել օգտատերերի մասին, որպեսզի ավելի ճշգրիտ թիրախավորի գովազդը: Բացի այդ, օգտվողներն օգտագործում են Google որոնման համակարգը:

OpenAI բրաուզերը ստեղծվել է Google-ի կողմից մշակված Chromium բաց կոդի հիման վրա, հայտնում են երկու աղբյուրներ։ Նույն կոդն օգտագործում են կորպորացիայի մյուս մրցակիցները, օրինակ՝ Microsoft-ը և Opera-ն։

ԱՄՆ Արդարադատության նախարարությունը ձգտում է տարանջատել Google-ը և վաճառել Chrome զննարկիչը՝ վերացնելու համար նրա մենաշնորհը։ Ընկերությունը պնդում  է, որ դա կփլուզի իր բիզնեսը։ OpenAI-ը հետաքրքրություն է հայտնել Chrome-ը գնելու հարցում, եթե տարանջատումն իրականում տեղի ունենա։