Google–ը հերթական պատկերանշանով նշել է Գրիմ եղբայրների հեքիաթների առաջին հրատարակության 200–ամյակը

ԵՐԵՎԱՆ, 20 դեկտեմբերի. /ԱՌԿԱ/.  Google ինտերնետ ընկերությունը Գրիմ եղբայրների հեքիաթների առաջին հրատարակության 200–ամյակը նշել է իր որոնողականի գլխավոր էջում տեղադրված տարբերանշանով, հաղորդում է ՌԻԱ Նովոստին։

google.com–ի գլխավոր էջի Google ավանդական տարբերանշանը հինգշաբթի փոխարինվել է պատկերաշարով, որը հիմնականում ներկայացնում է Գրիմ եղբայրների ամենահայտնի «Կարմիր գլխարկը» հեքիաթը։

Կայքից օգտվողը կարող է հետ ու առաջ անել պատկերները։ Դուդլի վերջին նկարը պատկերում է Կարմիր գլխարկի տատիկին, ով բազկաթոին նստած`  Google ընկերության անվանումն է գործում։

Գրիմ եղբայրները հայտնի գերմանացի լեզվաբաններ և բանահյուսական նմուշների հավաքողներ են եղել։ Համաշխարհային ճանաչում են նրանց  բերել «Գրիմ եղբայրների հեթիաթներ» հավաքածուները, որտեղ ընդգրկվել են նաև «Հենզելն ու Գրետելը», «Տիկին Մրրիկ», «Սպիտակաձյունիկը», «Ռապունցել», «Մոխրոտիկը» և այլ հեքիաթներ։

Հավաքածուի առաջին հատորը լույս է տեսել 1812 թվականի դեկտեմբերի 20–ին Բեռլինում` ընդամենը 900 հատ տպաքանակով և ընդգրկել է 86 հեքիաթ։ Յոթերորդ` վերջին հրատարակությունը, լույս տեսած 1857 թվականին, ընդգրկել է 210 հեքիաթ և լեգենդ։ 2005 թվականից Գրիմ եղբայրների հեքիաթների հավաքածուն ընդգրկվել է ՅՈՒՆԵՍԿՕ–ի «Աշխարհի հիշողություն» միջազգային ռեեստրում։  

Google ընկերությունը տարբերանշաններ է տեղադրում իր որոնողական համակարգի գլխավոր էջում` նշելով տարբեր տոնական ամսաթվեր, օրինակ` ազգային տոներ, հայտնի մարդկանց ծննդյան օրեր և այլն։

Օրինակ, սեպտեմբերին Google–ն ինտերակտիվ դուդլով նշեց «Աստեղային ճանապարհ» (Star Trek) գիտաֆանտաստիկ սերիալի պրեմիերայի 46–ամյակը, իսկ այս շաբաթ տարբերանշան էր տեղադրել «Շչելկունչիկ» հայտնի բալետի պրեմիերային 120–ամյակի պատվին։ ։

Google–ի նկարիչ Սոֆիա Ֆոսթեր–Դիմինոյի խոսքով, ընկերությունը տոնական տարբերանշանները դիտարկում է որպես կրթական գործիք, որը պատմում է օգտագործողներին տարբեր ամսաթվերի և հայտնի մարդկանց մասին։ -0-