Գրեթե 4 մլրդ մարդ չի օգտվում ինտերնետից

ԵՐԵՎԱՆ, 23 հունվարի. /ԱՌԿԱ/. Երկրի բնակչության կեսից ավելին (51%)` 3,9 մլրդ մարդ, չի օգտվում Ինտերնետից, FINMARKET.RU-ն մեջբերում է «Վեդոմոստիին», որը հղում է անում Էլեկտրակապի միջազգային միության (ԷՄՄ) հետազոտությանը:

Նրանց մեծ մասը (շուրջ 80%-ը) բնակվում է Ասիական-Խաղաղօվկիանոսյան տարածաշրջանում և Աֆրիկայում: ԱՊՀ երկրներում ինտերնետից չի օգտվում 93 մլն մարդ, կամ դրանց ընդհանուր բնակչության մեկ երրորդը:

Զարգացող երկրներում ինտերնետ չեն օգտագործում դրա` ոչ արդիական լինելու պատճառով, պնդում են զեկույցի հեղինակները:

Պատճառներից մեկը ցանցին միանալու համար անհրաժեշտ սարքերից օգտվելու իմացության բացակայությունն է: Երբեմն ինտերնետից օգտվելուն խոչընդոտում են մշակութային առանձնահատկությունները, սեռական անհավասարությունը և լեզվական պատնեշը (շատերը չեն կարողանում ինտերնետում իրենց լեզվով նյութեր գտնել): Բացի այդ, շատերը ինտերնետին չեն միանում ուղղակի, որովհետև այն իրենց հետաքրքիր չէ, և նրանք դրանում ոչ մի օգուտ չեն տեսնում, փաստում են ԷՄՄ-ի փորձագետները:

Ինտերնետից օգտվելու մակարդակը կապված է տնտեսության զարգացման մակարդակի հետ. առավել պակաս զարգացած երկրներում ինտերնետից չի օգտվում բնակչության 85 տոկոսը, մինդեռ զարգացած երկրներում այդ ցուանիշը կազմում է 22 տոկոս:

Յուրաքանչյուր երկրորդը, ով ինտերնետ չի օգտագործում, ապրում է այնպիսի երկրում, որոնց համախառն եկամուտը մեկ մարդու համար կազմում է 6500 դոլարից պակաս, ինտերնետից չօգտվող երկրի բնակիչների շուրջ 60 տոկոսը գյուղերի բնակիչներ են: Ինտերնետին չմիացածների մեծ մասը կանայք են (58%):  

Ինտերնետի հասանելիության վրա ազդում են նաև ինտերնետի, սարքերի և էլեկտրականության սակագները: Ինտերնետին չմիացած մարդկանց 57 տոկոսը չեն կարող իրենց դա թույլ տալ բարձր արժողության պատճառով:

Զարգացող երկրների մարդկանց մեծ մասին համար սմարթֆոնի ընդունելի գինը կազմում է 25-50 դոլար (GSMA): Այժմ սմարթֆոնների մեծ մասի արժեքը գերազանցում է 100 դոլարը, նշվում է զեկույցում: -0-