Մեծ հաղթանակի 70–ամյակի առթիվ տվյալների էլեկտրոնային բազա է ներկայացվել Երևանում
ԵՐԵՎԱՆ, 8 մայիսի. /ԱՌԿԱ/. Հայաստանի ազգային գրադարանն ուրբաթ ներկայացրել է «Հաղթանակ-70» տվյալների էլեկտրոնային բազան, որում ներկայացված են Հայրենական մեծ պատերազմին և, մասնավորապես, դրան հայ ժողովրդի մասնակցությանը վերաբերող նյութեր։
«Էլեկտրոնային բազայում, որի ուղղությամբ մեր աշխատակիցները սկսել են աշխատել մեկ ամիս առաջ, արդեն շուրջ 140 նյութեր կան` ամսագրերի, գրքերի, թերթերի հրապարակումներ, պաստառներ և լուսանկարներ։ Բազան մշտապես համալրվում է»,– շնորհանդեսի ընթացքում ասաց ՀԱԳ մատենագիտության և գիտական ուսումնասիրությունների բաժնի աշխատող Շողեր Ոսկանյանը։
Էլեկտրոնային բազան հասանելի է greenstone.nla.am հասցեով։
Ոսկանյանի խոսքով` ամենաառաջին նյութը վերաբերում է 1941 թվականին, իսկ ամենավերջինը` 2014 թվականին։ Բազայում մեծ թվով նյութեր կան` նվիրված 89–րդ Թամանյան դիվիզիային, Հաղթանակի գործում հայ կանանց ավանդին։
Լուսաբանվել է նաև շրջափակված Լենինգրադից Հայաստան տարհանված և այստեղ երկրորդ հայրենիք գտած երեխաների թեման։ Բոլոր նյութերը ռուսերեն են, բայց բազան կհամալրվի նաև հայերեն և այլ լեզուներով նյութերով։
Երկրորդ համաշխարհային պատերազմին մասնակցել է մոտ 600 հազար հայ, նրանցից մոտ 300 հազարը` Խորհրդային Հայաստանից, ավելի քան 200 հազար` ԽՍՀՄ այլ հանրապետություններից, մոտ 100 հազար հայ` արտասահմանից։ Պատերազմի հայ մասնակիցների թվում մոտ 10 հազարը կանայք էին, հիմնականում` կամավորներ։ Հայերի գրեթե կեսը (275 հազար) զոհվել է Հայրենական պատերազմի տարբեր ճակատներում։
Հայրենական մեծ պատերազմի հայ փառապանծ զորավարներից են Խորհրդային միության մարշալ Հովհաննես Բաղրամյանը, Զրահատանկային զորքերի գերագույն մարշալ Համազասպ Բաբաջանյանը, Ավիացիայի մարշալ Սերգեյ Խուդյակովը (Արմենակ Խանփերյանց), ԽՍՀՄ նավատորմի ծովակալ Իվան (Հովհաննես) Իսակովը, ինժեներական զորքերի մարշալ Սերգեյ Ագանովը։
Հայ ժողովուրդը պատրաստել և ռազմաճակատ է ուղարկել 6 մոտոհրաձգային դիվիզիա, իսկ Թամանյան 89–րդ դիվիզիան հասել է մինչ Բեռլին։ Հայկական սփյուռքի մոտ 100 հազար ներկայացուցիչ դաշնակիցների բանակի կողմից մասնակցել է դիմադրության շարժմանը։ --0--