ԵՏՄ երկրների հետ փաստաթղթաշրջանառության էլեկտրոնային համակարգի ձևավորումը Հայաստանի համար կարժենա 122 մլն դրամ
ԵՐԵՎԱՆ, 27 նոյեմբերի. /ԱՌԿԱ/. ԵՏՄ երկրների հետ փաստաթղթաշրջանառության էլեկտրոնային համակարգի ձևավորումը Հայաստանի համար կարժենա 122 մլն դրամ, հինգշաբթի կառավարության նիստի ժամանակ տեղեկացրեց ՀՀ կառավարության աշխատակազմի ղեկավար – նախարար Դավիթ Հարությունյանը։ Նա նշեց, որ ԵՏՄ–ի շրջանակներում փաստաթղթերի փոխանակումն իրականացվելու է գերատեսչությունների և աշխատանքային խմբերի մակարդակում, որոնք զբաղվում են օրենսդրության համաձայնեցման տարբեր ասպեկտներով։ Հարությունյանի խոսքերով` փաստաթղթաշրջանառության միասնական ձևաչափի ապահովման համար կստեղծվի հատուկ հանգույց, որը կտեղակայվի «էլեկտրոնային կառավարման ենթակառուցվածքների ներդրման գրասենյակ» պետական ՓԲԸ–ում, որը նոր համակարգի օպերատորն է։ Անվտանգության բոլոր չափորոշիչներն ու արձանագրությունները կլինեն միասնական ԵՏՄ բոլոր երկրների համար, իսկ համակարգի ծրագրային ապահովումը տրամադրել է ռուսական կողմը։ «Իրականացված գնահատման համաձայն` կենտրոնի տեխնիկական զինման համար կպահանջվի 122 մլն դրամ։ Նախատեսվում է, որ կենտրոնի թեստավորումը կսկսվի դեկտեմբերի 15–ից», – ասաց Հարությունյանը։ Եվրասիական բարձրագույն տնտեսական խորհուրդը հավանություն է տվել Հայաստանի միացմանը ԵՏՄ–ին։ Համապատասխան պայմանագիրը ստորագրվել է ուրբաթ, երկրների ղեկավարների մակարդակով` Մինսկում կայացած նիստի արդյունքում։ Այսպիսով` Հայաստանը Ռուսաստանին, Բելառուսին և Ղազախստանին հավասար դառնում է 2015 թվականի հունվարի 1-ից գործունեությունը սկսող ԵՏՄ–ի լիիրավ մասնակիցը։ ($1 – 434,11 դրամ) –0-