«Մեծ տվյալներ» եզրույթը շուտով դուրս կգա շրջանառությունից

ԵՐԵՎԱՆ, 21 մայիսի. /ԱՌԿԱ/. Երկու տարում «մեծ տվյալներ» եզրույթը կկորցնի կարևորությունը։ Այսպիսի կանխատեսում է արել Gartner–ի փոխնախագահ և առաջատար վերլուծաբան Դոլանդ Ֆայնբերգը (Donald Feinberg) Սան Պաուլուում կայացած Gartner's Business Intelligence and Information Management  գագաթնաժողովում։ Ֆայնբերգի կարծիքով, այդ եզրույթը կդադարեն օգտագործել իմաստն ու նշանակությունը հստակ չհասկանալու պատճառով, գրում է Cnews.ru–ն։

«Մեծ տվյալներ» եզրույթի մշտական օգտագործումը որոշակի թյուրըմբռնման պատճառ է դառնում, և միշտ չէ, որ թույլ է տալիս ընկերություններին ադեկվատ գնահատել իրենց բիզնեսի տվյալների հավաքման և վերլուծության անհրաժեշտությունը, կարծում է Ֆայնբերգը։ ««Մեծ տվյալներ» եզրույթը կկորցնի նշանակությունն առաջիկա երկու տարիներին։ Դրա փոխարեն մարդիկ կխոսեն պարզապես «տվյալների» մասին, առանց հստակեցման»,– նկատել է նա։ Միաժամանակ, հավաքագրումն ու վերլուծությունը կշարունակվի։

Գագաթնաժողովում իր ելույթի ժամանակ Ֆայնբերգն ասել է նաև, որ ժամանակակից ընկերությունները կարող էին զգալիորեն առաջ գնալ BI և վերլուծության բնագավառում, եթե չընկնկեին նորաձև դարձած «մեծ տվյալներ» հավաքելու միտումների հետևից։ Հետագայում տեղեկության վերլուծության և կառավարման գործիքները սրընթաց կզարգանան և կկենտրոնանան ավելի նեղ խնդիրների վրա, համոզված է փորձագետը։

Gartner–ի հետազոտությունները հաստատում են Ֆայնբերգի կանխատեսումը և ցույց են տալիս, որ ավելի մեծ թվով ընկերությունների է հետաքրքրել վերլուծությունը։ Այսպես, Gartner–ի հարցումը ցույց է տվել, որ 2013 թվականին ընկերությունների 64 տոկոսը միջոցներ է ներդրել կամ մտադրվել է ներդնել վերլուծական գործիքների մեջ, մինչդեռ 2012 թվականին այդպիսի ընկերությունների թիվը 12 տոկոսով պակաս էր։ -