Ապագան կանխորոշվում է տեխնոլոգիաների ներդրմամբ. Փաշինյան
ԵՐԵՎԱՆ, 14 հոկտեմբեր․/ԱՌԿԱ/. Ապագան կանխորոշվում է տեխնոլոգիաների ներդրմամբ, դրանց հետ հարաբերվելու ձևերի որդեգրմամբ ու այդ գործընթացները կառավարելու կարողությամբ: Այս մասին այսօր ասել է վարչապետ Նիկոլ Փաշինյանը Silicon Mountains 2025 տեխնոլոգիական գագաթնաժողովի շրջանակում իր ելույթում:
«Կառավարությունն աջակցում է տեխնոլոգիաների զարգացմանը և դրա համար անհրաժեշտ է՝ առաջինը կրթություն, երկրորդը՝ կրթություն, երրորդը՝ կրթություն: Հաջորդ քայլերը թվարկելով՝ կարող եմ հիշատակել ենթակառուցվածքները, լավ կարգավորումները, լավ քաղաքականությունները»,-նշել է նա։
Փաշինյանը նշել է, որ փողը նունպես կարևոր է։
«Իհարկե, նման դեպքերում շատերն ասում են և փորձում լրացնել կամ հարցադրում անում, թե կարծես մենք մոռացանք մեկ ուրիշ կարևոր բան, և խոսքը փողի մասին է։ Իհարկե, փողը շատ կարևոր է, բայց ես էլի ուզում եմ անդրադառնանք հարցին: Իսկ ի՞նչ է հարկավոր փող ունենալու համար: Կառավարությունն այս հարցին էլ ունի երեք պատասխան. Առաջինը՝ կրթություն, երկրորդը՝ կրթություն, երրորդը՝ կրթություն»,-ասել է նա։
Նա նշել է, որ մարդկանց խորհուրդ չի տալիս աշխատանք փնտրել իրենց բարեկեցությունը բարելավելու համար, այլ թույլ տալ, որ աշխատանքը գտնի իրենց։
«Տեխնոլոգիա երևույթը մշտապես ուղեկցում է քաղաքակրթությանը, տեխնոլոգիաների զարգացումն անընդհատ գործընթաց է»,-ասել է նա՝ հավելելով, որ այսօր արդեն գործ ունենք արհեստական բանականության հետ:
«Բայց դեռ այն ժամանակ, երբ մարդիկ սովորում էին, օրինակ, բուսաբուծություն, դա ևս տեխնոլոգիա էր: Չնայած մի քանի հազարամյակների զարգացմանը՝ հիմա գյուղատնտեսությունը զարգացման նոր էջ է բացել, որովհետև ի հայտ է գալիս ինտենսիվ գյուղատնտեսությունը»,-ասել է նա։
«Տեխնոլոգիաները եղել են, կան ու շարունակելու են մնալ մարդու կյանքը լավացնելու, բարեկեցության աստիճանը բարձրացնելու միջոց: Չնայած ասում ենք, որ տեխնոլոգիաները բերում են մարտահրավերներ ու սպառնալիքներ, բայց այս երևույթը նույնպես նորություն չէ: Բոլոր տեխնոլոգիաներն իրենց հետ բերել են սպառնալիքներ ու մարտահրավերներ»,-նկատել է Փաշինյանը:
Նա ընդունել է այն փաստը, որ այսօրվա տեխնոլոգիաները կարող են մարդուն կախվածության մեջ գցել: Միաժամանակ նա նկատել է, որ դրանք, սակայն, առաջին տեխնոլոգիան չեն, որ մարդուն կարող են կախվածության մեջ գցել: Այնուհետև նա բերել է դեղագործության օրինակը:
«Դա cutting edge տեխնոլոգիա էր, որը իր հետ բերեց նաև այլ մարտահրավերներ: Եվ այդ մարտահրավերները մինչև այսօր ոչ միայն առկա են, այլև ծավալվում են ամբողջ թափով: Բայց որևէ մեկի մտքով չի անցնում ուղղակի անջատիչն անջատել և դեղագործական տեխնոլոգիաները զրոյացնել»,-ասել է վարչապետը: