Հայկական սկսնակ ընկերությունները մասնակցում են հայ-ամերիկյան աքսելերացիոն ծրագրին
ԵՐԵՎԱՆ, 28 ապրիլի. /ԱՌԿԱ/. Հայկական 35 սկսնակ ՏՏ-ընկերություն մասնակցում է հայ-ամերիկյան աքսելերացիոն ծրագրին, հաղորդել են «Ձեռնարկությունների ինկուբատոր հիմնադրամի» (ՁԻՀ) մամուլի ծառայությունից:
Ծրագրի նպատակն է օգնել ՏՏ ոլորտի հայաստանյան ընկերություններին գործարար կապեր հաստատել Սիլիկոնյան հովտում և հաջողությունների հասնել արտասահմանյան շուկայում:
Հայաստան-ԱՄՆ ՏՏ ոլորտի աքսելերացիոն ծրագիրն իրականացնում են «Ձեռնարկությունների ինկուբատոր հիմնադրամը» (ՁԻՀ), Հայաստանի Հանրապետության կառավարությունը և Համաշխարհային բանկը՝ Ձեռներեցության զարգացման և ղեկավարների վերապատրաստման կենտրոն (CEED) հիմնադրամի համագործակցությամբ:
Ծրագրին մասնակցության հայտ էին ներկայացրել 73 ընկերություններ, որոնցից ընտրվել են 35 Տեղեկատվական տեխնոլոգիաների ոլորտի նորաստեղծ և նոր լուծումներ առաջարկող ընկերությունները: Նախնական փուլն անցած ընկերությունները մասնակցում են 6 շաբաթ տևողությամբ աքսելերացիոն ծրագրի հայաստանյան փուլին, որն իր մեջ ներառում է դասընթացներ, խորհրդատվություն և գաղափարներ ներկայացնելու կարողությունների զարգացման հմտություններ:
Հայաստանի և արտերկրի հաջողակ ձեռներեցները և փորձագետները սկսնակներին կպատմեն իրենց փորձի, բիզնես մոդելների, շուկայական ռսզմավարության զարգաման մասին:
Աքսելերացիոն ծրագրի ավարտին՝ մայիսի 14-ին, կանցկացվի «Դեմո օր», որի ընթացքում հայաստանյան փուլն անցած ընկերություններից կընտրվեն 5-ը, ովքեր կմասնակցեն 2016 թվականի հունիսին Սիլիկոնյան հովտում կայանալիք Հայաստանի ՏՏ ոլորտի սկսնակ ընկերություններին նվիրված համաժողովին: Մասնակիցները հնարավորություն կունենան աշխատելու նաև CEED-ի համաշխարհային ցանցի անդամ հանդիսացող գործարարների և ներդրողների հետ: -0-