Օրանժ Արմենիան 21,6 Մբ/վրկ արագության Wi-Fi-մոդեմներով է ապահովել մայրաքաղաքի 50 ավտոբո

ԵՐԵՎԱՆ, 15 հոկտեմբերի. /ԱՌԿԱ/. Օրանժ Արմենիա ընկերությունը Wi-Fi-սարքեր է թարմացրել Երևանի 50 ավտոբուսներում, ինչի շնորհիվ մեծացել է անվճար ինտերնետ կապի արագությունը, ինչպես նաև ավելացել է միաժամանակ կապին միացող օգտատերերի թիվը:

Օրանժ ընկերության և Երևանի քաղաքապետարանի գործակցության շրջանակում քաղաքային №5, 20, 41 և 28 երթուղային ավտոբուսներում տեղադրվել են մինչև 21,6 Մբ/վրկ ինտերնետի արագություն ապահովող MyBox 3G/Wi-Fi նոր մոդեմներ:

«Մեզ համար այս նախագիծը շատ կարևոր է, քանի որ այն իրականում ցույց է տալիս, թե որքանով են ընդունակ նոր տեխնոլոգիաները փոխել մարդկանց սովորական առօրյան: Օգտագործելով մեր տրամադրած բջջային ինտերնետի առավելությունները` ուղևորներն այսուհետ կարող են ավելի հետաքրքիր դարձնել իրենց ճանապարհը, անվճար շփվել ընկերների հետ, ինչպես նաև տեղեկանալ վերջին նորություններից»,- չորեքշաբթի լրագրողներին ասաց Օրանժ Արմենիա ընկերության գլխավոր տնօրեն Ալեքսանդր Եսայանը:

Նա ավելացրեց, որ Օրանժ Արմենիա ընկերության և Երևանի քաղաքապետարանի գործակցությունը «Wi-Fi ամենուր» ծրագրի շրջանակում սկսվել է դեռ 2011 թվականին, երբ քաղաքային ավտոբուսներում տեղադրվել էին MyFi-մոդեմներ:

«Տեխնոլոգիաների զարգացմանը զուգընթաց, ինչպես նաև հաշվի առնելով այն, որ վերջին ժամանակներում կտրուկ ավելացել է սմարթֆոնների և պլանշետների օգտագործողների թիվը, Օրանժ Արմենիան հին սարքերը փոխարինել է MyBox մոդեմներով, որոնք թույլ են տալիս միաժամանակ անվճար ինտերնետի միանալ 32 օգտագործողների` նախկին հինգի դիմաց»,- ավելացրեց Եսայանը:

«Երևան քաղաքի տեխնոլոգիաների կառավարման կենտրոնի» տնօրեն Սարգիս Մանուկյանն իր հերթին նշեց, որ այս ծրագիրը նախատեսված է ոչ միայն երևանցիների, այլ նաև մայրաքաղաքի հյուրերի համար:

«Երևան ժամանող զբոսաշրջիկները, բացի հայկական հյուրընկալությունից, ջերմ մթնոլորտից և հայկական խոհանոցից, հատկապես գնահատում են Wi-Fi-կապի լայն հասանելիությունը: Նշեմ, որ նույնիկ բազմաթիվ խոշոր եվրոպական քաղաքներ չեն կարող հպարտանալ դրանով: Այնպես որ, մենք հպարտանալու առիթ ունենք»,- նշեց նա:

Մանուկյանն ընդգծեց, որ 2012 թվականից Երևանի քաղաքապետի հանձնարարականով «Wi-Fi ամենուր» ծրագրի շրջանակում իրենք փորձել են այդ նպատակի շուրջ միավորել բոլոր բջջային օպերատորներին:

«Արդյունքոմ մայրաքաղաքի մետրոյի մի շարք կայարաններ, այգիներ, պուրակներ, գրադարաններ ապահովվել են անվճար Wi-Fi ինտերնետով: Ծրագրի ղեկավարն է Օրանժ Արմենիա ընկերությունը, որը Wi-Fi կապով ապահովել է քաղաքային տրանսպորտը: Հույս ունենք, որ այդ ծրագրի իրագործումը պետք է շարունակվի նաև հետագայում»:

Օրանժ Արմենիան France Telecom (ապրանքանիշը` Orange) ընկերության 100 տոկոսանոց դուստր ընկերությունն է, որը հայկական շուկա է մտել 2009թ.–ի նոյեմբերի 5–ին։ Այն ապահովում է ցանցի 83 տոկոսանոց ծածկույթ և բջջային ցանցի և ինտերնետ հասանելիություն հանրապետության 600 համայնքներում (քաղաքներում և գյուղերում)։ 

Աուդիտորական հաշվետվության համաձայն` ընկերությունը 2014 թ.–ին կրել է 4 մլրդ դրամի վնաս` 2013 թ.–ին կրած 3,85 մլրդ դրամի վնասի համեմատ։ 2014 թ.–ի վերջի տվյալներով` Օրանժ Արմենիայի ներդրումները հանրապետությունում իրականացրած հնգամյա գործունեության ընթացքում գերազանցել են 100 մլրդ դրամի։
-0-