«Էրեբունի-Երևան 2794» տոնակատարությանն ընդառաջ տեղի է ունեցել Երևանի քաղաքապետարանի պաշտոնական կայքի թարմացված տարբերակի շնորհանդեսը

ԵՐԵՎԱՆ, 11 հոկտեմբերի. /ԱՌԿԱ/. Երևանի քաղաքապետարանում տեղի է ունեցել www.yerevan.am պաշտոնական կայքի թարմացված տարբերակի շնորհանդեսը Քաղաքի օրվա տոնակատարության նախաշեմին, որն այս տարի կտոնվի հոկտեմբերի 14–ին։

«Երևանի քաղաքապետարանի պաշտոնական կայքի  գլխավոր էջում Երևանի քաղաքապետ Տարոն Մարգարյանի ողջույնի խոսքն է ինչպես երևանցիներին, այնպես էլ համայն աշխարհի հայերին ու մայրաքաղաքի հյուրերին։ Կայքը ծառայելու է նաև որպես բնակիչների և քաղաքապետարանի միջև համագործակցութան և համատեղ աշխատանք ծավալելու յուրօրինակ հարթակ»,– կայքի շնորհանդեսի ընթացքում ասաց աշխատակազմի տեղեկատվության և հասարակայնության հետ կապերի վարչության պետ Արթուր Գևորգյանը։

Տեղեկատվության և հասարակայնության հետ կապերի վարչության պետը մատնանշել է պաշտոնական կայքի գլխավոր էջում ներկայացված թեժ գծի 4 հեռախոսահամարները, որոնցից մեկը`1-08, գործում է շուրջօրյա, իսկ մյուս երեքը` 51-41-52, 51-41-87 և 51-42-36, բոլոր աշխատանքային օրերին` ժամը 9:00-ից մինչև 18:00:

Վարչության պետը ներկայացրել է նաև կայքի ինտերակտիվ քարտեզ բաժնում զետեղված «Էրեբունի-Երևան 2794» տոնակատարության շրջանակներում նախատեսված միջոցառումների, փակ փողոցների ցանկը և այլ մանրամասներ:

Երևան քաղաքի կառավարման տեխնոլոգիաների կենտրոնի տնօրեն Սարգիս Մանուկյանն էլ նախ նշել է, որ կայքի թարմացված տարբերակի հիմնական ֆունկցիոնալ առավելությունն է ուղիղ միացումով հետևել քաղաքի այս կամ այն հատվածի անցուդարձին կամ անցկացվող տարաբնույթ միջոցառումներին:

Նա ավելացրել է, որ կայքում նաև տեղադրված է Քաղաքի օրվան նվիրված տոնակատարությունների լուսանկարներով ամբողջական տեղեկատվությունը։

Քաղաքի օրվա տոնակատարությունները կանցկացվեն կիրակի Հայաստանի մայրաքաղաքում` «Իմ սրտի մայրաքաղաք» կարգախոսով։ Միջոցառումների անցկացման համար պետբյուջեից շուրջ 90 մլն դրամ ($220,8 հազար դոլար) կհատկացվի։

Տոնական միջոցառումների շրջանակներում, մասնավորապես, տեղի կունենա լվացող մեքենաների շքերթ, քաղաքի հիմնադրման թեմայով թատերական ներկայացումներ, կենտրոնական փողոցներով հանդիսավոր երթեր։

Երևանի կենտրոնի և վարչական շրջանների պուրակներում, հրապարակներում և փողոցներում ժողովրդական, դասական, ջազային և ռոք երաժշտության համերգներ, ցուցահանդեսներ, փողոցային երաժիշտների և միմերի ելույթներ, սթրիթբոլի մրցումներ, ավիամոդելիստների, հեծանվարշավներ կկազմակերպվեն։

Երեկոյան կենտրոնական Հանրապետության Հրապարակում տեղի կունենա շքեղ համերգ` հայկական էստրադայի աստղերի, դի–ջեյների և երաժիշտների  մասնակցությամբ։ Տոնակատարությունը կավարտվի կեսգիշերին մոտ` գունավոր հրավառությամբ։ --0—