RIM-ը հետաձգել է վերլուծաբանների համար շնորհանդեսը մինչև BlackBerry 10-ի թողարկումը. գործակալություն

ԵՐԵՎԱՆ, 28 մարտի. /ԱՌԿԱ/. Բջջային էլեկտրոնիկայի կանադական արտադրող Research in Motion ընկերությունը հետաձգում է ֆինանսական վերլուծաբանների համար ամենամյա շնորհանդեսը մինչև BlackBerry 10 նոր օպերացիոն համակարգի սմարթֆոնների հաջորդ սերնդի թողարկումը, հաղորդում է Ռոյթեր գործակալությունը:

Որպես կանոն՝ RIM ղեկավարությունը մայիսին կայացած BlackBerry World համաժողովի ժամանակ հանդիպել է ֆինանսացի փորձագետների հետ: Սակայն, ըստ ընկերության ներկայացուցիչ Թենիլ Քենեդիի (Tenille Kennedy)՝ այս տարի RIM-ը որոշել է համաժողովի թեման կենտրոնացնել սպառողների, մշակողների և գործընկերների շահերի վրա, հաղորդում է «ՌԻԱ Նովոստին»:

«Մենք առանձին հանդիպում կանցկացնենք, որը միտված կլինի ներդրումային հասարակության շահերին, ավելի ուշ այս տարի,  BlackBerry 10-ի գործարկումից հետո»,- հայտնել է Քենեդին: Միջոցառման հստակ ամսաթիվն ու վայրը նա չի նշել:

BlackBerry 10 (նախկինում հայտարարվում էր որպես BBX) նոր օպերացիոն համակարգի գործարկումն, ինչպես ակնկալվում է, թույլ կտա RIM-ին ծրագրային էկոհամակարգում համախմբել իր սմարթֆոններն ու պլանշետային համակարգիչները:

Նոր օպորացիոն համակարգի գործարկման պաշտոնական ամսաթիվը չի տեղեկացվում, բայց ակնկալվում է, որ առաջին սարքավորումները վաճառքի կհանվեն 2012թ.-ի երկրորդ կեսից ոչ շուտ: Հետաձգելով գործարկումը՝ ընկերությունը հուսով է սարքավորումներում առավել էներգաարդյունավետ չիպսետներ օգտագործել, որոնց մատակարարումն այն նախատեսում է 2012թ.-ի կեսին: -0-