Գնորդներին չվախեցնելու համար Microsoft-ը թաքցնում է նոր Windows 10–ը

ԵՐԵՎԱՆ, 16 հոկտեմբերի. /ԱՌԿԱ/. Microsoft–ը դիտմամբ խուսափում է Windows 10 օպերացիոն համակարգի նկատմամբ սպառողների չափազանց ուշադրությունից, քանի որ դա կարող է սպառողական ակտիվության կրճատման հանգեցնել տարեվերջի նախատոնական զեղչերի ժամանակահատվածում։ Ինչպես հաղորդում է Cnews.ru–ն, այդպես է կարծում Gartner–ի վերլուծաբան Մայքլ Սիլվերը  (Michael Silver)։

Փորձագետի կարծիքով, Microsoft–ը մտահոգվում է, որ եթե այժմ սկսի չափազանց շատ խոսել Windows 10–ի մասին, սպառողները կհրաժարվեն 2014 թվականի վերջին նոր համակարգիչ գնելու գաղափարից, քանի որ հաջորդ տարի ավելի շահավետ կլինի գնել սարքը միանգամից Windows 10–ով, որի թողարկումը ծրագրված է 2015 թվականին։

Վերլուծաբանը կարծում է, որ այդ պատճառով սեպտեմբերի 30–ին անցկացված միջոցառմանը Microsoft–ի ներկայացուցիչները հիմնականում խոսում էին կորպորատիվ հաճախորդների համար օպերացիոն համակարգի նոր տարբերակի մասին։

Microsoft–ը ծրագրում է 2015 թվականի սկզբին թողարկել սպառողների համար նախնական նոր տարբերակ, որը կունենա ավելի լայն հնարավորություններ Technical Preview–ի համեմատ։ Իսկ ապրիլին ծրագրված է համաժողով Microsoft–ի մշակողների համար։ -0-