iPhone–ի բյուջետային մոդելը պլաստիկ կորպուս և 4 դյույմանոց էկրան կստանա
ԵՐԵՎԱՆ, 29 հունվարի. /ԱՌԿԱ/. iPhone սմարթֆոնի բյուջետային մոդելը, որի մշակմամբ, ըստ ոչ պաշտոնական տվյալների, Apple–ն է զբաղվում, պլաստիկ կորպուս և 4 դյույմանոց էկրան կստանա, որի նմանը տեղադրված է iPhone 5–ում, տեղեկացրել է iLounge կայքը` հղում անելով իրավիճակին ծանոթ աղբյուրներին, հաղորդում է digit.ru–ն։
Ըստ պարբերականի տվյալների` Apple–ի սմարթֆոնի բյուջետային տարբերակի դեմերեսի կողմը գրեթե կնմանվի iPhone 5–ին։ Սարքի կորպուսը մետաղի փոխարեն պլաստիկ կլինի։ Բացի այդ, սարքի հետևի վահանակի ծայրերը կլորացված կլինեն, ինչպես դա արված է iPod classic փլեյերներում։
iPhone–ի ոչ թանկ մոդելի վերաբերյալ տեղեկատվությունն ավելի վաղ հրապարակեցին մի քանի հեղինակավոր պարբերականներ։ Apple–ի մարքեթինգի գծով ավագ փոխնախագահ Ֆիլիպ Շիլերը հերքել է էժան բաղադրիչներից սմարթֆոնի ստեղծման մասին տեղեկատվությունը, սակայն դա չի նշանակում, որ ընկերությունը չի պատրաստում ավելի մատչելի գնով iPhone–ի տարբերակը։
Ընկերությունը կարող է դիմել բյուջետային iPhone–ի թողարկմանը, որպեսզի դիմադրի էժան Android սմարթֆոնների արտադրողների ճնշմանը։ –0–