Հեքըթոն[ՅԱՆ] Գյումրի 2014 մրցույթում առաջին տեղը զբաղեցրեց Հ# թիմը Երևանից

ԵՐԵՎԱՆ, 11 նոյեմբերի. /ԱՌԿԱ/. Նոյեմբերի 8-9-ը Գյումրու տեխնոլոգիական կենտրոնում կայացավ ամենամեծ տեխնոլոգիական մրցույթը՝ Հեքըթոն[ՅԱՆ] Գյումրի 2014-ը, որն այս տարի ուներ մասնակիցների աննախադեպ քանակ: Մրցույթի մասնակիցների թիվը շուրջ 250 էր, որից 40% ՀՀ մարզերից էին՝ Գյումրիից, Վանաձորից և Իջևանից:

Ինչպես հայտնում է Ձեռնարկությունների ինկուբատոր հիմնադրամի մամուլի ծառայությունը, առաջին տեղը զբաղեցրեց Հ# թիմը Երևանից՝ արժանանալով Lenovo Yoga նոութբուքի: Հ# թիմը ներկայացրեց նոր հայիֆիկացված ծրագրավորման լեզու դպրոցականների համար, որը թույլ կտա կարճ ժամանակահատվածում ձեռք բերել ծրագրավորման պրակտիկ գիտելիքներ։

Երկրորդ տեղը գրավեց ու արժանացավ iPAD-ի Գյումրիի Walking Tour App-ը: Թիմը ներկայացրեց մոբայլ հավելված, որը նախատեսված է զբոսաշրջիկների համար և հնարավորություն է ընձեռում տեղեկություն ստանալ ոչ ավանդական տուրիստական քաղաքների և փոքր ավանների վերաբերյալ։

Nokia Lumia սմարթֆոնի արժանացավ Վանաձորի Paradox թիմը՝ զբաղեցնելով երրորդ հորիզոնականը: Նրանց նախագիծը ներկայացնում է էլեկտրական շղթաների սիմուլացիայի համար ստեղծված նոր ծրագրային լուծում։

Հեքըթոն[ՅԱՆ] Գյումրի 2014 նորարար գաղափարների և ծրագրավորման ամենամյա մրցույթը կազմակերպել էին Հայաստանի Մայքրոսոֆթ ինովացիոն կենտրոնը, Հանրային լրագրության ակումբը, Ձեռնարկությունների ինկուբատոր հիմնադրամը, Գյումրի տեխնոլոգիական կենտրոնը՝ Մայքրոսոֆթի հայաստանյան ներկայացուցչության և Հայաստանում ԱՄՆ-ի դեսպանատան աջակցությամբ:

Հեքըթոն[ՅԱՆ]-ի նպատակն էր կազմակերպել նորարարության և ծրագրավորման մի յուրատեսակ փառատոն, որտեղ թիմերը` կազմված ծրագրավորողներից և ոչ միայն, ընդամենը 24 ժամում մշակեցին և ժյուրիին ներկայացրեցին իրենց գաղափարը և առաջարկվող լուծման/ծրագրի/հավելվածի նախատիպը (դեմո տարբերակը):

Այս անգամ մրցույթը Երևանից տեղափոխվել էր Գյումրի և նպատակ ուներ խրախուսել Գյումրի քաղաքի, ինչպես նաև այլ քաղաքների ու մարզերի ակտիվ երիտասարդներին և ծրագրավորողներին մասնակցել մրցույթին և կյանքի կոչել իրենց գաղափարները:

Հեքըթոն[ՅԱՆ] Գյումրի 2014 –ը մաս է կազմում «Նորարարություն տեխնոլոգիայի միջոցով» ծրագրի, որը մասնավոր և պետական կառույցների համագործակցության օրինակ է Հայաստանի Մայքրոսոֆթ ինովացիոն կենտրոնի, Մայքրոսոֆթ Ար Էյ-ի, ԱՄՆ-ի միջազգային զարգացման գործակալության հայաստանյան առաքելության, ՀՀ կառավարության, Ձեռնարկությունների ինկուբատոր հիմնադրամի և Հայաստանի պետական ճարտարագիտական համալսարանի միջև:-0-