Հայաստանում բջջային և ինտերնետ կապի օպերատորները 2025թ․–ին վճարել են 42,28 մլրդ դրամի հարկեր և տուրքեր

ԵՐԵՎԱՆ, 26 հունվարի․/ԱՌԿԱ/․ Հայաստանի հեռահաղորդակցության խոշոր օպերատորները 2025 թվականին պետական բյուջե են վճարել 42,28 մլրդ դրամի հարկեր և տուրքեր։ Այս մասին են վկայում ՀՀ Պետական եկամուտների կոմիտեի հրապարակած 1000 խոշոր հարկ վճարողների ցանկի տվյալները։

Չորս օպերատորների՝ Viva Armenia-ի, Team Telecom Armenia-ի, Ucom-ի և GNC-Alfa-ի (OVIO բրենդ) կողմից վճարված հարկերի ընդհանուր կառուցվածքում հարկային մարմինների կողմից հավաքագրված միջոցները կազմել են 41,96 մլրդ դրամ, իսկ մաքսային մարմինների կողմից՝ 324,3 մլն դրամ։

Հեռահաղորդակցության օպերատորների վարկանիշը՝ ըստ վճարումների ծավալի.

1.     Viva Armenia – զբաղեցրել է ամենաբարձր դիրքը ոլորտում (16-րդ տեղ ընդհանուր ցանկում)՝ վճարելով 18,77 մլրդ դրամ:

2.     Ucom – զբաղեցրել է 26-րդ հորիզոնականը՝ ավելի քան 11,91 մլրդ դրամ ցուցանիշով:

3.     Team Telecom Armenia – պետբյուջե է փոխանցել 9,85 մլրդ դրամ (31-րդ տեղ):

4.     GNC-Alfa (OVIO ապրանքանիշ, նախկինում՝ «Ռոստելեկոմ») – վճարել է 1,75 մլրդ դրամ (205-րդ տեղ):

Հիշեցնենք, որ 1000 խոշոր հարկ վճարողների ընդհանուր մուտքերը 2025 թվականին գերազանցել են 1,95 տրլն դրամը։ Ցանկը գլխավորում է Mobile Center Art-ը (77,86 մլրդ դրամ), երկրորդ տեղում է Grand Tobacco-ն (66,12 մլրդ դրամ), իսկ եռյակը եզրափակում է Զանգեզուրի պղնձամոլիբդենային կոմբինատը (52,16 մլրդ դրամ)։ ($1 – 379,07 դրամ)