Երևանում մեկնարկել է DigiTec 2025 աննախադեպ միջոցառումը
ԵՐԵՎԱՆ, 10 հոկտեմբերի․/ԱՌԿԱ/․ Այսօր Երևանում մեկնարկել է DigiTec 2025 20–րո հոբելյանական միջոցառումը, այն կտևի մինչև հոկտեմբերի 12-ը։
Բացման արարողության ժամանակ ՀՀ բարձր տեխնոլոգիական արդյունաբերության նախարար Մխիթար Հայրապետյանը նշեց, որ DigiTec-ը լավ առիթ է տարվա արդյունքներն ամփոփելու համար։ Նա ձեռքբերումների թվում նշեց օրենսդրական բարեփոխումները և Starlink-ի և Plug and Play-ի նման միջազգային ընկերությունների հետ համագործակցության մեկնարկը։
«Տեխնոլոգիան գործիք է Երևանն ավելի կանաչ և մարդակենտրոն դարձնելու համար։ Այս օրերին մենք կներկայացնենք թվային Երևանը և տեխնոլոգիական լուծումները», - ասաց Երևանի քաղաքապետ Տիգրան Ավինյանը։
Նրա խոսքով՝ DigiTec–ը միավորում է մասնավոր հատվածը և հասարակությունը՝ ընձեռելով զարգացման հնարավորություններ։
DigiTec-ի կազմակերպիչ Առաջատար տեխնոլոգիաների ձեռնարկությունների միությունը (UATE), այս տարի ակնկալում է մոտ 40,000 այցելու և մասնակից՝ 20 երկրներից, ավելի քան 100 համաշխարհային ճանաչում ունեցող տեխնոլոգիական առաջատարների, ոլորտի լեգենդների, նորարարների, ինչպես նաև ցուցահանդեսային բաժնում 250 առաջատար ընկերությունների մասնակցություն, ինչը DigiTec-ը դարձնում է ամենահետաքրքիր միջոցառումը ոչ միայն Հայաստանում, այլև տարածաշրջանում։
Այս տարվա DigiTech–ը, թե՛ ցուցահանդեսային, թե՛ համաժողովային բաժիններում, կկենտրոնանա արհեստական բանականության, վենչուրային կապիտալի և տեխնոլոգիական ընկերությունների առաջադեմ աճի խնդիրների և մարտահրավերների վրա: 20-ամյակը խոստանում է աննախադեպ թվով միջոցառումներ։