Viva-ում ենթակառուցվածքների արդիականացում է․ հնարավոր են ձայնային և տվյալների փոխանցման ծառայությունների խափանումներ
ԵՐԵՎԱՆ, 21 օգոստոսի․/ԱՌԿԱ/․ Viva ընկերությունը տեղեկացնում է, որ Հայաստանի քաղաքներում և գյուղերում 5G տեխնոլոգիայի ներդրման նպատակով մեկնարկել են ենթակառուցվածքի արդիականացման լայնածավալ աշխատանքներ:
«Ռադիոցանցի ենթակառուցվածքի համապարփակ ներդաշնակեցման համար կպահանջվի ժամանակ՝ ներառյալ հետագա փորձարկումն և մշտադիտարկումը՝ նոր ցանցի կայունացման նպատակով: Աշխատանքների իրականացման ընթացքում, առանձին տեղանքներում հնարավոր է ձայնային և տվյալների փոխանցման ծառայությունների որակի կարճաժամկետ նվազում կամ անհասանելիություն», – նշել են ընկերությունից։
Աշխատանքներն իրականացվում են վաղ առավոտյան ժամերին՝ ցանցի նվազագույն ծանրաբեռնվածության ժամանակահատվածում:
«Viva-ն հայցում է իր բաժանորդների ներողամտությունը պատճառած անհանգստության համար: Ընկերության տեխնիկական անձնակազմը կանի հնարավորը՝ բարձրորակ և հուսալի ծառայությունների մատուցման ու ծածկույթի ապահովման նպատակով»,– նշվում է ընկերության հաղորդագրության մեջ։