Ucom–ը պաշտոնապես կհայտարարի Orange Armenia–ի բրենդի փոփոխության մասին
ԵՐԵՎԱՆ, 18 մարտի. /ԱՌԿԱ/. Ucom հեռահաղորդակցական ընկերությունը մարտի 21–ին պաշտոնապես կհայտարարի Orange Armenia–ի բրենդի փոփոխության մասին, հաղորդում է ընկերության մամուլի ծառայությունը։
Ucom–ը Orange Armenia բջջային օպերատորի լիիրավ բաժնետերն է։
Երկուշաբթի` մարտի 21–ին նախատեսված է ընկերության ներկայացուցիչների մամուլի ասուլիսը, որի ընթացքում նրանք պաշտոնապես կներկայացնեն ոչ միայն բրենդի փոփոխության, այլ նաև Orange Armenia–ի հետ ձուլման փաստը։
«ԱՌԿԱ» գործակալությանն ավելի վաղ Ucom–ի մամուլի ծառայությունից ոչ հաստատեցին, ոչ էլ հերքեցին բրենդի փոփոխության մասին տեղեկատվությունը։
Վերջին ժամանակներում սոցիալական ցանցերում և հայկական հեռուստաալիքներում կարճ տեսանյութեր են հայտնվել, որոնցում համադրվում են երկու ընկերությունների գունային երկու երանգները` ցուցադրելով անցումը նարնջագունից (Orange Armenia–ի գույնը) վառ կանաչի (Ucom–ի գույնը)։
Այդ 10-15 վայրկյան տևողությամբ տեսահոլովակները չեն ուղեկցվում որևէ տեքստով կամ ընկերությունների ապրանքանիշներից մեկի անվանումով, միայն վերջում հայտնվում է «ժամանակն է» կանաչ գրառումը։ Սակայն ամեն ինչ խոսում է վերաբրենդավորման մասին։ Օրինակ, տեսահոլովակներից մեկում աղջիկը նարնջագույն ավտոմեքենայով մոտենում է ավտոկայանատեղի, բայց հեռանում է այնտեղից կանաչ մոտոցիկլով։
Մյուս տեսահոլովակում նարնջագույն շապիկով կինն ուսումնասիրում է ՈՒՁՀ պատասխանը և փաթաթվում վառ կանաչ շարֆով։
Վարորդի համար լուսացույցի դեղինի փոխարեն վառվում է կանաչ լույսը։
Բարմենը նարնջագույն բաժակի մեջ կանաչ կոկտեյլ է լցնում։
Ucom ընկերությունը Հայաստանում 2009թ. սկսած կառուցել է գերժամանակակից օպտիկամանրաթելային ցանց, որը հնարավորություն է տալիս մեկ կապուղով մատուցել երեք ծառայություն՝ ինտերնետ, հեռուստատեսային ծառայություն և հեռախոսակապ: 2015թ. հունիսի դրությամբ ընկերությունն ունի ավելի քան 100 000 բաժանորդ և 800-ից ավելի աշխատակից: Համագործակցելով համաշխարհային գերհզոր ընկերությունների հետ` Ucom-ը կարողացել է իր հաստատուն դիրքը գրավել Հայաստանի հեռահաղորդակցման շուկայում:
2015 թ.–ի սեպտեմբերին Ucom ընկերությունը ձեռք բերեց Orange Armenia բջջային ընկերության (ապրանքանիշը` Orange) բաժնետոմսերի 100 տոկոսը, որը France Telecom–ի նախկին դուստրն էր և գործում է հայկական շուկայում 2009 թ.–ի նոյեմբերի 5–ից։ –0–