Microsoft–ը դատի է տվել ԱՄՆ իշխանություններին օգտագործողներին հետևելու մասին իրազեկումն արգելելու համար

ԵՐԵՎԱՆ, 15 ապրիլի. /ԱՌԿԱ/. Microsoft ընկերությունը դատի է տվել ԱՄՆ իշխանություններին իր օգտատերերին հետևելու մասին իրազեկելու իրավունքի համար։ Խոսքը նրանց էլեկտրոնային փոստի հասանելիություն ստանալու մասին է, գրում է newsru.com–ը` հղում անելով Reuters–ին։

Սիեթլի դաշնային դատարան ուղղած փաստաթղթում նշվում է, որ իշխանությունների` ընկերության հաճախորդների էլեկտրոնային փոստի և այլ փաստաթղթերի հասանելիություն ստանալու իրազեկման արգելքը խախտում է ԱՄՆ Սահմանադրության Չորրորդ ուղղումը, որի համաձայն, մասնավոր անձինք կամ ընկերություններն իրավունք ունեն իմանալու, արդյո՞ք, կառավարությունը փնտրում կամ կատարում է իրենց սեփականության առգրավում։ Բացի այդ, Microsoft–ի իրավաբանների կարծիքով, արգելքը խախտում է նաև Սահմանադրության Առաջին ուղղումը, որը երաշխավորում է խոսքի ազատությունը։

Ինչպես նշում են Microsoft–ում, խոսքը հեռացված սերվերներում (ամպի վրա) պահվող տվյալների մասին։ «Օգտատերերը չեն հրաժարվում իրենց իրավունքներից, երբ իրենց տվյալները բեռնում են ամպի մեջ»,– ասվում է Microsoft–ի հայցում։ Բացի այդ, ընկերության կարծիքով, կառավարությունն օգտվել է ամպային տեխնոլոգիաների տարածմամբ գաղտնի հետաքննություններ կատարելու համար։

Վերջապես, ընկերության հայցում նշվում է, որ միայն վերջին 18 ամիսների ընթացքում Microsoft–ն իր հաճախորդների տվյալները բացելու ավելի քան հինգ հազար հրահանգ է ստացել, և գրեթե դրանց կեսի դեպքում իշխանություններն արգելել են իրազեկել օգտագործողներին այդ մասին։  

Միաժամանակ, հարցումների մեծամասնությունը վերաբերել է ֆիզիկական անձանց, ոչ թե կորպորատիվ հաճախորդներին, իսկ իրազեկման արգելքի գործողության ժամկետները չեն նշվել։

Reuters–ը նշում է, որ Microsoft–ի հայցը շարունակում է ԱՄՆ իշխանությունների դեմ տեխնոլոգիական ընկերությունների պայքարը։ Դիմակայության նախորդ ակտն Apple–ի և ՀԴԲ–ի միջև ահաբեկչին պատկանող սմարթֆոնի ապաարգելափակմանն էր վերաբերում։ Ամերիկյան հատուկ ծառայությունն Apple–ից պահանջում էր ստեղծել iOS–ի հատուկ տարբերակ, որը թույլ կտար շրջանցել Սան–Բերնարդինոյի դիպուկահար Սաիդ Ֆարուքի iPhone–ի անվտանգության համակարգը։ 

ՀԴԲ–ի պահանջին կողմ է արտահայտվել Կալիֆոռնիայի դատարանը, սակայն Apple–ի ղեկավար Թիմ Քուկը հայտնել է, որ ընկերությունը մտադիր չէ հատուկ ԾԱ ստեղծել ՀԴԲ–ի համար, քանի որ այդ քայլը կվտանգի iPhone–ի միլիոնավոր օգտագործողների անվտանգությունը։ Արդյունքում ՀԴԲ–ին հաջողվել է հասնել Ֆարուքի այֆոնում պահվող տեղեկությանն առանց ընկերության օգնության։ -0-