Google-ը փակում է իր գեոլոկացիոն ֆոտոսերվիսը

ԵՐԵՎԱՆ, 14 հոկտեմբերի. /ԱՌԿԱ/. Google ընկերությունը հայտարարել է 2005 թ.-ին գործարկված լուսանկարների փոխանակման Panoramio գեոլոկացիոն ֆոտոսերվիսը փակելու մտադրության մասին: Ծառայությունը, որը երկար ժամանակ ծառայել է որպես Google Maps-ի քարտեզների և լուսանկարների աղբյուր, կդադարեցնի իր աշխատանքը նոյեմբերի 4-ին, հաղորդում է vesti.ru-ն:

Panoramio-ն հիմնվել է 2005 թ.-ի ամռանը` իսպանացի երկու ձեռնակատերեր Հոաքին Աբելի և Էդուարդո Ագիլարի կողմից: 2007 թ.-ի հուլիսին Google-ը գնեց նրանց start-up-ը: Այս տարվա հոկտեմբերի 8-ի դրությամբ, Panoramio-ի միջոցով Երկրի տարբեր անկյուններից ներբեռնվել է ավելի քան 94 մլն լուսանկար: Ծառայության լսարանը կազմում էր ավելի քան 100 մլն մարդ:

Panoramio ինտերնետ-որոնիչը նախընտրում է լուսանկարների ներբեռնման համար «հարազատ» գործիքները, որոնք Local Guides (Տեղական զբոսավարներ) ծրագրի շրջանակում կցված են Google Maps-ին: Local Guides-ն օգտատերերի հանրություններն են, որոնք օգնում են կատարելագործել առցանց քարտեզները` կանոնավոր հրապարակելով իրենց գնահատականները և պատասխանելով հարցերին:

Մեկ տարվա ընթացքում Panoramio-ն հասանելի կլինի «միայն ընթերցման համար» ռեժիմով. հնարավոր կլինի միայն նայել և ուղարկել լուսանկարը, բայց ոչ ներբեռնել նորերը: Google-ը նաև խորհուրդ է տալիս միացնել Panoramio-ի էջը Google+-ին, ինչը թույլ կտա ավտոմատ կերպով տեղափոխել լուսանկարները ալբոմների մեջ: 2017 թ.-ի նոյեմբերի 4-ից հետո Panoramio-ի բոլոր էջերը կոչնչացվեն: -0-