Beeline-ը դադարեցրել է TelCell, Idram և EasyPay տերմինալների միջոցով վճարումների ընդունումը
ԵՐԵՎԱՆ, 16 փետրվարի. /ԱՌԿԱ/. «ԱրմենՏել» ՓԲԸ–ն (ապրանքանիշը` Beeline) հայտարարում է 2017թ.-ի փետրվարի 16-ից TelCell, Idram և EasyPay ընկերությունների տերմինալների միջոցով վճարումների ընդունման դադարեցման մասին, հաղորդում է ընկերության մամուլի ծառայությունը։
Ընկերությունից հայտնում են, որ այս որոշման պատճառն է վերոնշյալ ընկերությունների անհավասար միջնորդավճարային քաղաքականության դրսևորումը Beeline բաժանորդների հանդեպ:
Բջջային կապի դիմաց վճարային տերմինալների միջոցով կատարվող վճարումների ժամանակ մյուս օպերատորներից 1001 և ավել դրամ վճարումներն ընդունվում են առանց որևէ հավելյալ միջնորդավճարի, իսկ Beeline-ի բջջային կապի դիմաց միջնորդավճարը չի պահվում միայն սկսած 10 000 դրամից:
«Հաշվի առնելով վերոնշյալը` Beeline-ն առաջարկեց TelCell, Idram և EasyPay ընկերություններին աշխատել մյուս օպերատորներին հավասար շուկայական պայմաններում և հաճախորդից չգանձել միջնորդավճար 1000 և ավել դրամ վճարման դեպքում: Ցավոք սրտի ընկերությունը ստացավ մերժում, ինչի հետևանքով ստիպված է միջոցներ ձեռնարկել պաշտպանելու սեփական և իր բաժանորդների շահերը», – նշվում է ընկերության հաղորդագրության մեջ։
Ընկերությունը ներողամտություն է հայցում պատճառված անհարմարությունների համար և տեղեկացնում, որ Beeline կապի ծառայությունների համար առանց միջնորդավճարի կարելի է վճարել ընկերության վաճառքի գրասենյակներում, բանկերում, ընկերության կայքում (բանկային քարտերի), ինչպես նաև Beeline Armenia բջջային հավելվածի միջոցով:
«Beeline-ն աշխատում է արդար պայմանների ձեռքբերման ուղղությամբ, ընկերությունը բաց է երկախոսության համար և հիմնական խնդիր է համարում հավասարաչափ և արդարացի վերաբերմունքի ապահովումն իր բաժանորդների հանդեպ», – նշվում է ընկերության հաղորդագրության մեջ։
«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ:-0-