ԱՄՆ–ն սահմանափակել է պետկառույցների կողմից Կասպերսկու պրոդուկտների օգտագործումը
ԵՐԵՎԱՆ, 12 հուլիսի. /ԱՌԿԱ/. ԱՄՆ նախագահ Դոնալդ Թրամփի վարչակազմը երեքշաբթի հանել է «Կասպերսկու լաբորատորիան» այն մատակարարների ցուցակից, որոնց արտադրանքը գնում են պետական կառույցները։ Այդ մասին հայտնել է ՏԱՍՍ–ը` հղում անելով Reuters–ին։
Նշվում է, որ ռուսաստանյան ընկերության արտադրանքը հանվել է այն մատակարարների անվանումները պարունակող ԱՄՆ ընդհանուր ծառայությունների ադմինիստրացիայից, որոնց հետ թույլատրվում է տեղեկատվական տեխնոլոգիաների կամ թվային ֆոտոսարքավորումների բնագավառի ծառայությունների մատուցման պայմանագրեր ստորագրել։
Գերատեսչության ներկայացուցչի խոսքով, այդ որոշումն ընդունվել է «մանրամասն դիտարկումից հետո»։
Գործակալությունը նշում է, որ պետկառույցներում առաջվա պես կկարողանան օգտվել «Կասպերսկու լաբորատորիայի» արտադրանքից, եթե դրա գնումը չկատարվի Ընդհանուր ծառայությունների ադմինիստրացիայով։
Ամերիկյան ԶԼՄ–ներում վերջին ամիսներին մի քանի անգամ շահարկվել է այ, որ «Կասպերսկու լաբորատորիան» սերտորեն կապված է ՌԴ հետախուզական ծառայությունների հետ։ Ընկերության ղեկավար Եվգենի Կասպերսկին հուլիսի սկզբին Associated Press (AP) ամերիկյան գործակալությանը տված հարցազրույցում հայտնել էր ամերիկյան իշխանություններին իր ընկերության մշակած ծրագրերի ելքային կոդը` հնարավոր կասկածանքները փարատելու համար։
Reuters գործակալությունը հունիսի 29–ին հայտնել է, որ ԱՄՆ Կոնգրեսի Սենատի զինված ուժերի կոմիտեն հանդես է եկել ԱՄՆ պաշտպանության նախարարությանը «Կասպերսկու լաբորատորիայի» ծրագրային ապահովումն օգտագործելն արգելելու նախաձեռնությամբ։ -0-