Ucom-ի բաժանորդների համար 43 երկրներում կգործի 15 դրամ/ՄԲ ռոմինգի հատուկ սակագինը
ԵՐԵՎԱՆ, 24 մայիսի./ԱՌԿԱ/. Այսօրվանից Ucom շարժական կապի բաժանորդները 43 երկրներ մեկնելիս կօգտվեն շարժական ինտերնետի հատուկ՝ 15 դրամ/ՄԲ սակագնից, հաղորդում է ընկերության մամուլի ծառայությունը։
Մասնավորապես հիմնական զբոսաշրջային ուղղություններով՝ Վրաստանում, Եգիպտոսում, Հունաստանում, Կիպրոսում, Իտալիայում, Իսպանիայում, Ֆրանսիայում, Ռուսաստանում, ԱՄՆ-ում իրենց ամառային հանգիստը պլանավորած բաժանորդները մինչև սեպտեմբերի 20-ը կարող են վայելել մտերիմների հետ մշտապես կապի մեջ մնալու այս հրաշալի հնարավորությունը։
«Ucom-ի շարժական կապի բաժանորդները կարող են անհոգ լինել իրենց ամառային հանգիստը պլանավորելիս, քանի որ զարգացող ОТТ-լուծումների դարաշրջանում մենք հասկանում ենք ռոմինգում մատչելի ինտերնետ ունենալու անհրաժեշտությունը։ 43 երկրներում գործող Ucom-ի գործընկեր-օպերատորների աջակցությամբ կարողացել ենք այնպիսի լուծում առաջարկել, ինչի արդյունքում մեր բաժանորդները չեն ունենա աստղաբաշխական թվերով հաշիվ։ Մատչելի ռոմինգն արդեն իրականություն է, պարզապես ակտիվացրեք այն մեկնելուց առաջ՝ հավաքելով *121#», - նշել է Ucom ընկերության համահիմնադիր և գլխավոր տնօրեն Հայկ Եսայանը։
Ընկերությունից նաև տեղեկացնում են, որ 15 դրամ/ՄԲ սակագինը գործում է 43 երկրներում Ucom-ի գործընկեր-օպերատորների ցանցին միանալու պարագայում։ Օպերատորների և երկրների ամբողջական ցանկը հասանելի է հետևյալ հղումով։
Ucom ընկերությունը Հայաստանում 2009թ. սկսած կառուցել է գերժամանակակից օպտիկամանրաթելային ցանց, որը հնարավորություն է տալիս մեկ կապուղով մատուցել երեք ծառայություն՝ ինտերնետ, հեռուստատեսային ծառայություն և հեռախոսակապ:–0–