Նոր նամականիշ՝ նվիրված «Հայոց պետականություն. ՀՀ Ոստիկանության հիմնադրման 100-ամյակը» թեմային
ԵՐԵՎԱՆ, 31 հոկտեմբերի. /ԱՌԿԱ/. 2018 թվականի հոկտեմբերի 31-ին ՀՀ Ոստիկանության շենքում «ՀայՓոստ» ՓԲԸ-ի կողմից մարվեց և շրջանառության մեջ դրվեց մեկ նամականիշ՝ նվիրված «Հայոց պետականություն. ՀՀ Ոստիկանության հիմնադրման 100-ամյակը» թեմային, հայտնում է ընկերության մամուլի ծառայությունը:
Նամականիշն ունի 120 ՀՀ դրամ անվանական արժեք: Այն տպագրված է Ֆրանսիայի «Cartor» տպագրատանը` 30 000 տպաքանակով: Նամականիշի դիզայնի հեղինակն է «ՀայՓոստ» ՓԲԸ-ի դիզայներ Դավիթ Դովլաթյանը:
«Նամականիշի վրա պատկերված է Հայաստանի Հանրապետության ոստիկանության խորհրդանիշը և «100 ամյակ» գրությունը հայերեն և անգլերեն լեզուներով՝ կատարված մատնահետքերի տեսքով: Նամականիշի խորապատկերին ներկայացված է Հայաստանի Հանրապետության եռագույնը», - նշվում է տարածած հաղորդագրությունում:
Նամականիշի մարումն իրականացրեցին ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանը, Հայաստանի Հանրապետության Ոստիկանության պետ, ոստիկանության գնդապետ Վալերիյ Օսիպյանը, «ՀայՓոստ» ՓԲԸ-ի նախագահ Խուան Պաբլո Գեչիջյանը, ՀՀ Ֆիլատելիստների միության նախագահ Հովիկ Մուսայելյանը:-0-