Իրանի պաշտոնյաներին կարգելվի օգտվել սմարթֆոններից
ԵՐԵՎԱՆ, 15 հունիսի. /ԱՌԿԱ/. Իրանցի պաշտոնյաներին, ովքեր հասանելիություն ունեն գաղտնի տեղեկատվության նկատմամբ, կարգելվի աշխատավայրում օգտվել սմարթֆոններից։ Ինչպես գրում է Cnews.ru–ն, այս մասին հաղորդում է AFP–ն` հղում անելով Իրանի քաղաքացիական պաշտպանության կազմակերպության ղեկավար Գոլամրեզա Ջալալին (Gholamreza Jalali)։
Սմարթֆոնները հուսալի սարքեր չեն, հայտարարել է Ջալալին ISNA իրանական լրատվական գործակալությանը։ Սմարթֆոններում հայտնված տվյալները պահպանվում են, և հետագայում դրանք հնարավոր չէ ամբողջությամբ ջնջել, այդ պատճառով այդ տվյալները կարող են հասանելի դառնալ կողմնակիցներին, հայտարարել է նա։ Գերատեսչության ղեկավարը հայտարարել է, որ սմարթֆոններից օգտվելու արգելքը պայմանավորված է լրտեսության իրականացման մտավախությամբ, որի ժամանակ կարող են օգտագործվել կապի բջջային սարքեր։
Ինչպես տեղեկացրել է Ջալալին, պաշտոնյաները կօգտագործեն «ուրիշ բջջային հեռախոսներ կարևոր տեղեկատվության հետ կապ ունեցող աշխատանքի ժամանակ»։ Նա չի նշել, թե կոնկրետ ինչ հեռախոսներ են օգտագործվելու, սակայն նշել է, որ հիմնական սպառնալիքը, նրանց կարծիքով, բխում է բջջային հեռախոսների արտադրանքով զբաղվող արևմտաեվրոպական ընկերություններից։ Հիմա իշխանությունները սպասում են սմարթֆոններից հրաժարվելու մասին պաշտոնական հրամանին։
Սմարթֆոններից հրաժարվելու մասին որոշումն ընդունվել է այն բանից հետո, երբ Իրանի իշխանություններն իմացել են, թե ինչպես են իսրայելցի հակերներն իբր գաղտնալսել Իրանի և այլ պետությունների միջև տեղի ուենցած հեռախոսային խոսակցությունները, որոնք վերաբերում են միջուկային ծրագրին։ Իսրայելն իր հերթին ժխտում է գաղտնալսման մասին տեղեկությունը։
Բացի այդ, Իրանը չափազանց մեծ ուշադրություն է դարձնում նմանատիպ միջադեպերին։ 2010 թ.–ին Իրանը դարձել էր ամերիկյան հատուկ ծառայությունների կազմակերպած գրոհի զոհը։ Stuxnet տրոյանի օգնությամբ ամերիկյան հատուկ ծառայությունները կարողացել էին հասանելիություն ստանալ ուրանի հարստացման գործարանների լոկալ ցանցերի նկատմամբ և շարքից հանել էին գործարաննում տեղադրված ցենտրիֆուգաները։ ԱՄՆ–ն այդ ամենը ժխտում է։ –0–