ՎիվաՍել-ՄՏՍ-ը շարունակում է աջակցել «Օպերային արվեստը Հայաստանի մարզերում» ծրագրին
ԵՐԵՎԱՆ, 14 սեպտեմբերի. /ԱՌԿԱ/. Շարունակվում է ՎիվաՍել-ՄՏՍ-ի և Ա. Սպենդիարյանի անվան օպերայի և բալետի ազգային ակադեմիական թատրոնի աջակցման հիմնադրամի համագործակցությունը` ուղղված Հայկական օպերային և դասական արվեստի պահպանմանը, զարգացմանն ու տարածմանը:
Օպերային թատրոնի սիմֆոնիկ նվագախմբի երաժիշտների և մեներգիչների մասնակցությամբ հերթական համերգները կայացել են Շիրակի մարզի Վահրամաբերդ գյուղում և Արագածոտնի մարզի Ուշի գյուղում:
«Կան իրադարձություններ, որոնք առաջին հայացքից կարող են սովորական գնահատվել, սակայն դրանց իրական ազդեցությունը դրսևորվում է հետագա կյանքում: Այս ծրագրով մենք ձգտում ենք լուծել կարևոր խնդիր. Օպերային երաժշտարվեստը հասանելի դարձնել մարզերում բնակվող մեր հայրենակիցներին, և երեխաներին սովորեցնել գեղեցիկ մտածել: Ուզում եմ հավատալ, որ այն միջոցառումները, որոնք իրականացվել են 2014թ.-ից, որպես հետագիծ՝ իրենց դրական ազդեցությունը կթողնեն մատաղ սերնդի գիտակցության մեջ»,- ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
«Օպերային արվեստը Հայաստանի մարզերում» նախագծի շնորհիվ, որի երաժշտական ղեկավարը ՀՀ վաստակավոր արտիստ Կարեն Դուրգարյանն է, մարզերում կատարումներով հանդես են եկել Հայաստանի և արտերկրից ժամանած արտիստներ: Միջոցառումների մուտքը եղել է ազատ:
Ծրագիրն իրականացվում է 2014 թվականից` Ա. Սպենդիարյանի անվան օպերայի և բալետի ազգային ակադեմիական թատրոնի աջակցման հիմնադրամի հետ միասին: Առ այսօր մայրաքաղաքում և Հայաստանի մարզերի մշակութային օջախներում, տարբեր կրթօջախներում և սահմանամերձ գյուղերի զորամասերում հիմնադրամն իրականացրել է ավելի քան 70 միջոցառում` համերգ, ներկայացում, կյանքի են կոչվել տարբեր նախագծեր: Մինչև տարեվերջ կկազմակերպվի ևս 23 միջոցառում:
ՎիվաՍել-ՄՏՍ (Ղ-Տելեկոմ) ընկերությունը հայկական շուկայում գործում է 2005 թվականից: Ընկերության բաժնետոմսերի 80 տոկոսը պատկանում է Ռուսաստանի և ԱՊՀ բջջային կապի խոշորագույն օպերատոր «Մոբիլնիե Տելեսիստեմի» ԲԲԸ-ին, մնացած 20 տոկոսը պատկանում է լիբանանյան Fattouch Group ներդրումային խմբին – 0-